މެންބަރުންގެ މުސާރަ ކުޑަކުރަން ގޮވާލައި ޕެޓިޝަނެއް

ރައްޔިތުންގެ މަޖިލީހުގެ މެންބަރުންގެ ލިބޭ މުސާރައާއި ބައެއް އިނާޔަތްތައް ކުޑަކުރަން ގޮވާލައި އޮންލައިން ޕެޓިޝަނެއްގައި ސޮއިކުރަން ފަށައިފި އެވެ.

އެ ޕެޓިޝަނަކީ މެންބަރުންގެ މުސާރަ ކުޑަކޮށް ކޮމިޓީ އެލަވަންސް އުނިކުރުމުގެ އިތުރުން މެންބަރުންނާއި އެ ބޭފުޅުންގެ އާއިލާތަކަށް މިހާރު ދޭ ހާއްސަ ހެލްތު އިންޝުއަރެންސް ކަނޑާލައި ކުރީގެ މެންބަރުންނަށްށް ދޭ އެލަވަންސް ކަނޑާލުމަށެވެ.

އާންމުންގެ ބަޔަކު ކުރިއަށް ގެންދާ މި ޕެޓިޝަން ހިއްސާކޮށް ސޯޝަލް މީޑިއާގައި ކުރަމުންދާ ޕޯސްޓުތަކުގައި މަޖިލިސް މެންބަރުންގެ އާމްދަނީ އާއި މަސައްކަތް ނުބައްދަލު ކަމަށް ބުނެ މެންބަރުންނަށް ގިނަ ފާޑުކިޔުންތަކެއް އަމާޒުކޮށްފައިވެ އެވެ. އެގޮތުން ބޮޑު މުސާރައިގެ އިތުރުން ކޮންމެ ތިން މަހަކުން ލިބޭ ޗުއްޓީއާ އަލާބަލާ އިރު މަތި ނަމަވެސް މެންބަރުން ކުރާ ގާނޫނީ މަސައްކަތުގެ ފެންވަރު ދަށްކަން ފާހަގަކޮށްފައިވެ އެވެ. ކަމަށް އެ ޕޯސްޓުގައި ބުނެފައިވެ އެވެ.

އަދި ގައުމުގެ މިހާރުގެ އިގުތިސާދީ ހާލަތު ދަށްވެ އާންމުންގެ ދިރިއުޅުމުގެ ހާލަތު ދުވަހަކަށްވުރެ ދުވަހެއް ގޯސްވަމުންދާ އިރު، މެންބަރުންނަށް ދައުލަތުން ދޭ އާމްދަނީ ދަށް ކުރަން ޖެހޭ ކަމަށް ވެސް ޕެޓިޝަންގައި ފާހަގަކޮށްފައިވެ އެވެ.

މިހާރު ކޮންމެ މެންބަރަކަށް މަހު މުސާރައިގެ ގޮތުގައި 82500ރ. ލިބެ އެވެ. އޭގެއިތުރުން، ބައިވެރިވާ ކޮންމެ ކޮމިޓީ ބައްދަލުވުމަކަށް އެލަވަންސަކާއި މެންބަރު އަދި އާއިލާއަށް ރާއްޖެއިންނާއި ބޭރުގެ ބައެއް ގައުމުތަކުން ހެލްތު އިންޝުއަރެންސްގެ ހާއްސަ ޕެކޭޖެއް ދައުލަތުން ދެ އެވެ.

މަޖިލިސް މެންބަރުންނާއި މިނިވަން މުއައްސަސާތަކުގެ ވެރިންގެ މުސާރައިން 10 ޕަސެންޓް އުނިކުރަން ދާދި ފަހުން ސަރުކާރަށް މަޖިލީހަށް ހުށަހެޅި ނަމަވެސް ގާނޫނަށް ބަދަލުތަކެއް ގެނެސްގެން ނޫނީ އެކަން ނުކުރެވޭނެ ކަމަށް ބުނެ އެ ބިލް މަޖިލީހުން ވަނީ ބޭރުކޮށްލައިފަ އެވެ.

ޕެޓިޝަންގެ ލިންކަކީ https://www.change.org/p/cut-mp-salaries-and-excessive-benefits?recruiter=1207331372&recruited_by_id=7fd13730-bf18-11eb-8466-7b1f86f87507&utm_source=share_petition&utm_campaign=starter_onboarding_share_personal&utm_medium=copylink މި އެވެ.