ރައްޔިތުންގެ މަޖިލީހުގެ މެންބަރުންގެ މުސާރަ ކުޑަކޮށްފިނަމަ، އެ ބޭފުޅުން އިންތިހާބުވުމަށް ނެގި ދަރަނިތައް އަދާކުރާނެ ގޮތެއް ނޯންނާނެ ކަމަށް އިނގުރައިދޫ ދާއިރާގެ މެންބަރު އިބްރާހިމް ފަލާހު ވިދާޅުވެއްޖެ އެވެ.
ފަލާހު މިހެން ވިދާޅުވެފައިވަނީ ރައްޔިތުންގެ މަޖިލީހުގެ މެންބަރުންގެ ލިބޭ މުސާރައާއި ބައެއް އިނާޔަތްތައް ކުޑަކުރަން ގޮވާލައި އޮންލައިން ޕެޓިޝަނެއްގައި ސޮއިކުރަން ފަށާފައިވާ ދަނޑިވަޅެއްގަ އެވެ.
އެކްސްގައި މިރޭ ކުރެއްވި ޕޯސްޓެއްގައި ފަލާހު ވިދާޅުވީ އެއީ ގޯސް ޚިޔާލެއް ނޫން ކަމަށާއި ނަމަވެސް އެމްޑީޕީގެ ސުޕަ މެޖޯރިޓީ އޮތް، މިދިޔަ 19 ވަނަ މަޖިލީހުގެ މެންބަރުން ދިޔައީ މެންބަރެއްގެ މުސާރަ 100،000ރ. އަށް ހަދަން ކަމާ ގުޅުންހުރި ކޮމިޓީން ފާސްކޮށްފައި ކަމަށެވެ. ނަމަވެސް އެކަން އެގޮތަށް ނުކުރަން އިރުޝާދު ދެއްވީ މިހާރުގެ ރައީސް ޑރ. މުހައްމަދު މުއިއްޒު ކަމަށް ފަލާހު ވިދާޅުވި އެވެ.
ފަލާހު ވިދާޅުވީ ދައުރެއްގެ މެދު ތެރެއިން މުސާރަ ކުޑަކުރުމަށް ވުރެ ރަނގަޅު ވާނީ އާ ދައުރެއް ފެށުމުގެ ކުރިއަށް މުސާރަ ކުޑަކުރުން ކަމަށެވެ.
"އަލަށް 21ވަނަ މަޖިލީހަށް މެމްބަރަކަށް 5000 ރުފިޔާ ކަނޑައެޅީމަ އެމުސާރަ އޯކޭވެގެން ކުރިމަތިލާ މެމްބަރުންނަކަށް ޝަކުވާކުރެވޭކަށް ނޯންނާނެ،" ފަލާހު ވިދާޅުވި އެވެ.
މި މަޖިލިސް އިންތިހާބުގެ ކެމްޕެއިނަށް މެންބަރުން ހަރަދުކުރުމާއި ހަރަދުކުރަން ދަރަނި ނަގާނީ ލިބޭ މުސާރައެއް ބަލައިގެން ކަމަށްވެސް ވިދާޅުވި އެވެ.
"އެތައް މިލިއަން ރުފިޔާ ޚަރަދުކޮށް މަޖިލީހަށް ވަންނަ ތަނުން މުސާރަ ކުޑަކޮށްލުމުން އިިންތިޚާބަށް ނެގިދަރަނި އަދާކުރާނެ ގޮތެއް ނޯންނާނެ," ފަލާހު ލިޔުއްވި އެވެ.
މީގެއިތުރުން މަޖިލިސް މެންބަރުންގެ އިތުރުން ކުރީގެ ރައީސުންނަށް ދޫކުދާ އިނާޔަތާއި ފަނޑިޔާރުންގެ އިނާޔަތްތައް ވެސް ޕެޓިޝަނުގައި ޖެހި ނަމަ ވަރަށް ރަނގަޅުވީސް ކަމަށް ވެސް ފަލާހު ވިދާޅުވި އެވެ.