ރައީސް ޑރ. މުހައްމަދު މުއިއްޒު އިނގިރޭސިވިލާތަށް ކުރައްވާ ދަތުރުފުޅެއްގައި މިރޭ ފުރާވަޑައިގަންނަވައިފި އެވެ.
ރައީސް އޮފީހުން ބުނީ މި މަހުގެ 5 ވަނަ ދުވަހުގެ ނިޔަލަށް ރައީސް ކުރައްވާ މި ދަތުރުފުޅަކީ އިނގިރޭސި ޕްރިމިއާ ލީގުގެ އެންމެ ބޮޑު އެއް ކްލަބު ކަމަށްވާ، ލިވަޕޫލްގެ ސީއީއޯ ބިލީ ހޯގަންގެ ދައުވަތަކަށް ކުރައްވާ ދަތުރުފުޅެއް ކަމަށެވެ.
މި ދަތުރުފުޅުގައި ރާއްޖޭގެ ޓޫރިޒަމް ޕްރޮމޯޓް ކުރަން ލިވަޕޫލްއާއެކު ކުރިއަށް ގެންދިޔުމަށް ހަމަޖެހިފައިވާ ބޮޑު ކެމްޕޭނު ރަސްމީކޮށް ފެށުމުގެ ރަސްމިއްޔާތުގައި ރައީސް ބައިވެރިވެވަޑައިގަންނަވާނެ އެވެ.
މީގެއިތުރުން ލިވަޕޫލްގެ ފަރިތަކުރުންތައް ކުރިއަށްގެންދާ ފެސިލިޓީއަށް ރައީސް ޒިޔާރަތް ކުރެއްވުމަށް ވެސް ވަނީ ހަމަޖެހިފަ އެވެ. އަދި އިނގިރޭސިވިލާތުގައި ތައުލީމު ހާސިލުކުރަމުންދާ ދިވެހި ދަރިވަރުންނާއި ބައްދަލުކޮށް ޔުނިވާސިޓީ އޮފް ލީޑްސް އަށް ވެސް ރައީސް ވަޑައިގަތުމަށް ވަނީ ހަމަޖެހިފަ އެވެ.
ލިވަޕޫލްގެ އޮފިޝަލް ޓޫރިސްޓް ޑެސްޓިނޭޝަން ޕާޓްނަރަކަށް ރާއްޖެ ހަމަޖައްސައި، އެ ކްލަބާއެކު އެމްއެމްޕީއާރުސީން މިދިޔަ މަހުގެ 13 ވަނަ ދުވަހު ވަނީ އެއްބަސްވުމެއްގައި ސޮއިކޮށްފަ އެވެ.
މި އެއްބަސްވުމުގެ ދަށުން މި މަހު ފަށާ ހަރަކާތުގައި އިނގިރޭސިވިލާތުގެ މުހިންމު ސަރަހައްދުތަކުގައި ކުރިއަށް އޮތް ތިން މަސް ދުވަހު ހައި އިމްޕެކްޓް އައުޓްޑޯ އަދި ޑިޖިޓަލް އިޝްތިހާރު މެދުވެރިކޮށް ރާއްޖޭގެ ފަތުރުވެރިކަން ޕްރޮމޯޓްކުރުމުގެ މަސައްކަތް ކުރިޔަށް ގެންދާނެ އެވެ.
އެގޮތުން 100 އަށް ވުރެ ގިނަ ޓެކްސީއާއި ލަންޑަންގެ ބަސްތަކުގައި ރާއްޖޭގެ މަންޒަރުތައް ދައްކާލާނެ ކަމަށާއި އަދި އަންޑަގްރައުންޑްގައި އިޝްތިހާރުކޮށް ބޮޑެތި އެއާޕޯޓުތަކާއި ވިޔަފާރި ލައުންޖްތަކުގަ ވެސް ރާއްޖެ އިޝްތިހާރުކުރާނެ ކަމަށް އެމްއެމްޕީއާރްސީން ބުނެ އެވެ.
މި ހަރަކާތުގެ ސަބަބުން 76 މިލިއަން މީހުންނަށް ރާއްޖެ ފޯރާނެ ކަމަށް ލަފާކުރެވޭ ކަމަށާއި، އަދި އެންމެ ފަހުގެ ލަގްޒަރީ ޓްރެވަލް ޑެސްޓިނޭޝަންގެ މަގާމު ދެމެހެއްޓުމަށް ކުރަމުންދާ މަސައްކަތް ހަރުދަނާވެގެން ދާނެ ކަމަށް ވެސް އެމްއެމްޕީއާރުސީން ބުންޏެވެ.
ލިވަޕޫލާ ގުޅިގެން ކުރިޔަށް ގެންދާ މި ހަރަކާތުގެ ސަބަބުން މި އަހަރު ލައްކައަކަށް ވުރެ ގިނަ ފަތުރުވެރިން ރާއްޖެ އަންނާނެ ކަމަށާއި، އާމްދަނީގެ ގޮތުގައި ރާއްޖެއަށް 200 މިލިޔަން ޑޮލަރު ލިބޭނެ ކަމަށް އެމްއެމްޕީއާރުސީން ލަފާކުރެ އެވެ.