ރައްޔިތުންގެ މަޖިލީހުގެ މެމްބަރުންގެ މުސާރަ ކުޑަކުރަން ދެކޮޅު ކަމަށް މޯލްޑިވްސް ޑިވަލޮޕްމަންޓް އެލަޔަންސް (އެމްޑީއޭ)ގެ ނައިބު ލީޑަރު އަދި ވެލިދޫ ދާއިރާގެ މެމްބަރު މުހައްމަދު އައްބާސް ވިދާޅުވެއްޖެ އެވެ.
އައްބާސް މިހެން ވިދާޅުވެފައިވަނީ ރައްޔިތުންގެ މަޖިލީހުގެ މެންބަރުންގެ ލިބޭ މުސާރައާއި ބައެއް އިނާޔަތްތައް ކުޑަކުރަން ގޮވާލައި އޮންލައިން ޕެޓިޝަނެއްގައި ސޮއިކުރަން ފަށާފައިވާ ދަނޑިވަޅެއްގަ އެވެ. މަޖިލީހުގެ މެންބަރެއްގެ މުސާރަ އާއި އެލަވަންސުގެ ގޮތުގައި މަހަކު 85،000ރ. ލިބެ އެވެ.
އެކްސްގައި ކުރެއްވި ޕޯސްޓެއްގައި އައްބާސް ވިދާޅުވީ މަޖިލިސް މެންބަރުންގެ މުސާރާއާ އިނާޔައްތައް ކުޑަކުރަން ދެކޮޅު ކަމަށާއި މަޖިލިސް މެމްބަރުން އަދާކުރަމުން ދަނީ ވަރަށް ބޮޑު ޤައުމީ، ފަރުދީ ޒިންމާއެއް ކަމަށެވެ.
"ލިބޭ މުސާރައަކުން ދެކޮޅު ނުޖެހޭ. ލިވިން އެލަވަންސް އަށް ވުރެ އެޕާޓްމެންޓު ތަކުގެ ކުލިބޮޑު. ދާއިރާގެ ކޮންމެ ރަށެއްގައި ހިންގާ ކުޅިވަރު މުބާރާތްތަކާއި، ތަރައްޤީގެ މަސްރޫޢުތަކަށް އެތަކެއް ހާސް ރުފިޔާ ކޮންމެ މަހަކު ހަރަދުކުރޭ،" އައްބާސް ވިދާޅުވި އެވެ.
އައްބާސް ވިދާޅުވީ ދާއިރާގެ ރައްޔިތުން ބޭސްފަރުވާ އަށް މާލެ އައުމުން އަދި ރާއްޖެއިން ބޭރަށް ބޭސްފަރުވާ އަށް ދާ ރައްޔިތުންނަށް އެތައް ހާސް ރުފިޔާއެއް ކޮންމެ މަހަކު ހަރަދުވާ ކަމަށެވެ. އަދި ކޮންމެ ހާލަތެއް ދިމާވިޔަސް ދާއިރާގެ މެޖޯރިޓީ ރައްޔިތުން ގުޅަމުން ދަނީ ދާއިރާގެ މަޖިލިސް މެމްބަރަށް ކަމަށާއި ބޮޑު މުސާރަ ލިބޭ އެހެން އެއްވެސް ސިޔާސީ ބޭފުޅަކަށް ދާއިރާގެ ރައްޔިތުން ނުގުޅާނެ ކަމަށްވެސް ވިދާޅުވި އެވެ.
"މަޖިލިސް މެންބަރުންގެ މުސާރަ އަށްވުރެ މިނިސްޓަރުން އާއި ސްޓޭޓް މިނިސްޓަރުން އާއި ކުންފުނިތަކުގެ އެމްޑީންގެ މުސާރަ ބޮޑުވާނެ،" އޭނާ ވިދާޅުވި އެވެ.
އައްބާސް ވަނީ ސިޔާސީ ބަޔަކު އިސްވެ ތިބެ ރައްޔިތުންގެ މަޖިލިސް މެންބަރުންގެ މުސާރަ ކުޑަކުރުމަށް ބަޔަކު އިސްވެ ތިބެ ޕެޓިޝަނެއްގައި ސޮއި ކުރުވަމުންދަނީ ވަރަށް މަކަރުވެރި ރޭވުމެއްގެ ތެރެއިން ކަމަށްވެސް ވިދާޅުވެފަ އެވެ.
"ހަޤީގަތުގައި ރައްޔިތުން ތިވީ ވަރަށް ދަތި ހާލަތުގައި. އާސަންދަ ލިބުނެއް ކަމަކު ރާއްޖެއިން ބޭރަށް ގޮސް ތިބުމާ، ކެެއުމާ، ޓެކްސީ ހަރަދުތައް ކުރުމަށް އެތައް ހާސް ރުފިޔާއެއް ހަރަދު ކުރަން ޖެހުމާ އެކު ނިކަމެތި ރައްޔިތު މީހާއަށް ކަންކަން މަގުފަހިކޮށްދެނީ ހަމައެކަނި ރައްޔިތުން މަޖިލިސް މެންބަރުން،" އައްބާސް ވިދާޅުވި އެވެ.
އެ ނިކަމެތި ރައްޔިތުންނާ އަޅާލަން ތިބި ދާއިރާތަކުގެ ރައްޔިތުންގެ މަޖިލިސް މެންބަރުންގެ މުސާރަ ކުޑަކުރަން ބަޔަކު އުޅެނީ ރައްޔިތުންނަށް ހަމައެކަނި އެހީތެރިކަމެއް ދެމުން ދަނީ މަޖިލިސް މެންބަރުން ކަމަށް ވެފައި ރައްޔިތުން އިތުރަށް ނިކަމެތިކުރުމުގެ މަކަރުވެރި ނިޔަތުގައި ކަމަށް އައްބާސް ވިދާޅުވި އެވެ. އަދި ސިފައިން އާއި ފުލުހުންގެ މައިންބަފައިންނާ އާއިލާއަށް މުޅިން ހިލޭ ބޭސްފަރުވާ ކުރެވޭ އިރު މަޖުލީސް މެންބަރުންގެ މައިންބަފައިނަށް އެ ޕެކޭޖުގެ ތެރެއިން ބޭސްފަރުވާ ނުކުރެވޭ ކަމަށްވެސް އައްބާސް ވިދާޅުވި އެވެ.
އައްބާސް ވަނީ ރައްޔިތުންގެ މެދުގައި ފިތުނަ އުފައްދަން ހަޤީގަތާ ހިލާފު ދޮގު ވާހަކަތައް ނުފެތުރުމަށް ވެސް ގޮވާލާފަ އެވެ.