އަނިޔާގެ ސަބަބުން ގިނަ ދުވަސްތަކެއް ކުޅުމާ ދުރުގައި ހުރެފައި ބުކާޔޯ ސަކާ އެނބުރި އައި މެޗުގައި ޖެހި ގޯލުން އިނގިރޭސި ޕްރިމިއާ ލީގުގައި ފުލަމް އަތުން 2-1 އިން އާސެނަލް މޮޅުކޮށްދީފި އެވެ.
ސަކާގެ ފައިގެ ފަލަމަސްގަނޑަށް އަނިޔާވީ މިދިޔަ ޑިސެމްބަރު މަހުގެ ތެރޭގައި ކަމަށްވާއިރު، އެ އަނިޔާގެ ސަބަބުން އޭނާއަށް އާސެނަލުން ކުޅުނު 13 މެޗެއް ގެއްލިފައިވެ އެވެ. ސަކާ ނެތްތަން އާސެނަލްގެ އެޓޭކުން ފާއިތުވި މެޗުތަކުގައި ވަރަށް ބޮޑަށް ފެނިގެން ގޮސްފައިވެ އެވެ.
ރޭގެ މެޗުގެ 37 ވަނަ މިނެޓުގައި އާސެނަލަށް ލީޑު ނަގައިދިނީ އެޓީމުގެ މިޑްފީލްޑަރު މިކޭލް މެރީނޯ އެވެ. މިއީ ފުލަމްގެ އޭރިއާ ތެރޭ ހުރެ ފޮނުވާލި ހަމަލާއަކުން މެރީނޯ ކާމިޔާބުކުރި ގޯލެކެވެ. ދެވަނަ ހާފުގައި ސަކާ ކުޅެން އެރުވިއިރު، އޭނާ ވަނީ ކުޅެން އެރިތަ ހަތް މިނެޓްތެރޭ އާސެނަލްގެ ދެވަނަ ގޯލު ކާމިޔާބުކޮށްދީފަ އެވެ.
ފުލަމްގެ ހަމައެކަނި ގޯލު މެޗުގެ ފަހު ވަގުތުކޮޅުތެރޭ ކާމިޔާބުކޮށްދިނީ ރޮޑްރިގޯ މުނީޒް އެވެ. މި މެޗުގެ ވަރަށް ކުރީކޮޅު އަނިޔާގެ ސަބަބުން އާސެނަލްގެ ޑިފެންޑަރު ގެބްރިއަލް ވަނީ ބަދަލުކޮށްފަ އެވެ.
މި މޮޅާއެކު އާސެނަލް އޮތީ 30 މެޗުން ލިބުނު 61 ޕޮއިންޓާ އެކު ލީގުގެ ދެވަނައިގަ އެވެ. އެއްވަނައިގައި 29 މެޗުން 70 ޕޮއިންޓު ހޯދައިގެން އޮތީ ލިވަޕޫލް އެވެ. ލިވަޕޫލުން މިރޭ އަމިއްލަ ދަނޑުގައި އެވަޓަންއާ ދެކޮޅަށް ނިކުންނާނެ އެވެ.
ޕްރިމިއާ ލީގުގައި ރޭ ކުޅުނު އެހެން މެޗުތަކަށް ބަލާއިރު ނޮޓިންހަމް ފޮރެސްޓުން ވަނީ 1-0 އިން މެންޗެސްޓާ ޔުނައިޓެޑް ބަލިކޮށް ލީގުގެ ތިންވަނައިގައި ހަމަޖެހިފަ އެވެ. އެޓީމު ތިންވަނައިގައި އޮތީ 30 މެޗުން ލިބުނު 57 ޕޮއިންޓާއެކު އެވެ. ޔުނައިޓެޑް އޮތީ 30 މެޗުން ލިބުނު 37 ޕޮއިންޓާއެކު ލީގުގެ 13 ވަނައިގަ އެވެ.
ފޮރެސްޓްގެ ދަނޑުގައި ކުޅުނު މެޗުގައި ފެނިގެންދިޔަ ހަމައެކަނި ގޯލު އެޓީމަށް ފުރަތަމަ ހާފުގައި ކާމިޔާބުކޮށްދިނީ ޔުނައިޓެޑަށް ކުރިން ކުޅުނު އެންތޮނީ އެލާންގާ އެވެ.