ރެއާލް ސޮސިއެޑާޑް އަތުން 4-3 އިން ބަލިވި ނަމަވެސް އެގްރިގޭޓުން ކުރި ހޯދައިގެން ސްޕެނިޝް ކަޕްގެ ފައިނަލަށް ރެއާލް މެޑްރިޑް ދަތުރުކޮށްފި އެވެ.
މި ދެ ޓީމު ބައްދަލުކުރި ސެމީފައިނަލްގެ ފުރަތަމަ ލެގުގެ މެޗު 1-0 އިން ކާމިޔާބުކުރީ ރެއާލުންނެވެ. ރެއާލް ފައިނަލަށް ދަތުރުކުރީ 5-4 ގެ އެގްރިގޭޓް ނަތީޖާއަކުން ކުރި ހޯދައިގެންނެވެ.
ރެއާލްގެ ދަނޑުގައި ކުޅުނު މެޗުގެ 16 ވަނަ މިނެޓްގައި ބެރަންޓިއާ ވަނީ ސޮސިއެޑާޑަށް ލީޑު ނަގައިދީފަ އެވެ. ނަމަވެސް މެޗުގެ 30 ވަނަ މިނެޓްގައި އެންޑްރިކްގެ ގޯލުން ރެއާލުން ނަތީޖާ އެއްވަރުކުރި އެވެ. ދެވަނަ ފަހަރަށް ވެސް މި މެޗުގައި ލީޑު ނެގީ ސޮސިއެޑާޑުންނެވެ. މިއީ މެޗުގެ 72 ވަނަ މިނެޓްގައި ރެއާލްގެ ޑިފެންޑަރު ޑޭވިޑް އަލާބާ އަތުން ބައިކޮޅަށް ވަތް ގޯލެކެވެ. މެޗުގެ 80 ވަނަ މިނެޓްގައި މިކޭލް އޮޔަޒަބާލްގެ ގޯލުން ސޮސިއެޑާޑުން ލީޑު ފުޅާކުރި ނަމަވެސް އޭގެ ދެ މިނެޓް ފަހުން ޖޫޑް ބެލިންހަމް ވަނީ ރެއާލްގެ ދެވަނަ ގޯލު ކާމިޔާބުކޮށްދީފަ އެވެ.
އަދި އޭގެ ހަތަރު މިނެޓް ފަހުން އައުރެލިއަން ޗުއަމެނީ ރެއާލަށް ނަތީޖާ އެއްވަރުކޮށްދިން ނަމަވެސް މެޗުގެ ފަހު ވަގުތުކޮޅުތެރޭ އޮޔަޒަބާލް ވަނީ ސޮސިއެޑާޑަށް އަލުން ލީޑު ނަގައިދީފަ އެވެ.
މެޗުގެ ފުރިހަމަ ވަގުތު ހަމަވިއިރު ދެ ޓީމުވެސް އެގްރިގޭޓުން އެއްވަރުވެފައި އޮތުމުން ނަތީޖާ ނެރުމަށް ވަނީ އިތުރު ވަގުތުގެ ދެ ހާފް ކުޅެފަ އެވެ. މި މެޗުން ރެއާލް މޮޅުވި ގޯލު އިތުރު ވަގުތުގެ ދެވަނަ ހާފްގައި ކާމިޔާބުކޮށްދިނީ އެޓީމުގެ ޑިފެންޑަރު އެންޓޯނިއޯ ރުޑިގާ އެވެ.
ސްޕެނިޝް ކަޕްގެ ފައިނަލްގައި ރެއާލް ބައްދަލުކުރާނީ ދެވަނަ ސެމީފައިނަލްގައި މިރޭ ބާސެލޯނާ އާއި އެތުލެޓިކޯ މެޑްރިޑް ބައްދަލުކުރާ މެޗުން މޮޅުވާ ޓީމަކާ އެވެ. އެ ދެ ޓީމު ބައްދަލުކުރި ސެމީގެ ފުރަތަމަ ލެގުގެ މެޗު ނިމުނީ 4-4 އިން އެއްވަރުވެގެންނެވެ.
ފައިނަލް އޮންނާނީ މި މަހުގެ 26 ވަނަ ދުވަހު އެވެ.