އެމްސީޔޫ ޓީޗަރސް ފުޓުސަލް ކަޕް 2015ގައި ކެންގަރޫ ކިޑްސްއާއި، ޝަރަފުއްދީން ސްކޫލުގެ އަންހެންޓީމް ކުޅުނު މެޗު އެއްވަރު ވެއްޖެއެވެ.
ފޯރިގަދަ ކުޅުމެއް ފެނިގެން ދިޔަ މިމެޗް ނިމުނީ 4-4 އިން އެއްވަރުވެގެންނެވެ.
އިއްޔެގެ މެޗުގައި ޝަރަފުއްދީން ސްކޫލް އިން 1-4 ލީޑެއްގައި އޮއްވައި ކެންގަރޫ ކިޑްސް އިން މެޗުގެ ނަތީޖާ ހަމަހަމަ ކުރީ ފަހަތުން އަރައި 3 ލަނޑު ޖަހައިގެންނެވެ.
މިމެޗުގެ މޮޅު ކުޅުންތެރިއަކަށް ހޮވިފައިވަނީ ކެންގަރޫ ކިޑްސް އަށް 3 ލަނޑު ޖަހައިދިން ފާތިމަތު ނާޝިތާ އެވެ.
މިއަދު ހަވީރު ވެސް މި މުބާރާތުގެ މެޗްތައް ކުޅޭނެއެވެ. އެގޮތުން ފުރަތަމަ މެޗުގައި ބައްދަލުކުރާނީ އުޖާލާ ޕްރީސްކޫލާއި މެދުވަލު ޕްރީސްކޫލެވެ. ދެވަނަ މެޗުގައި ބައްދަލުކުރާނީ އަމާން ޕްރީސްކޫލާއި ހިތަދޫ ސްކޫލެވެ.