ރޯދަ ހަދިޔާއެއްގެ ގޮތުގައި ސަރުކާރުން ރައްޔިތުންނަށް މަސްދަޅު ކޭސް ބެހީ 79.4 މިލިއަން ރުފިޔާ ހަރަދުކޮށްގެން ކަމަށް ފިނޭންސް މިނިސްޓްރީން ބުނެފި އެވެ.
އެ މިނިސްޓްރީން ބުނީ ރާއްޖޭގެ ގޭބިސީތަކަށް 108،000 އަށް ވުރެ ގިނަ މަސްދަޅު ކޭސް ބެހި ކަމަށެވެ.
ޖުމްލަ 108،801 ކޭސް މަސްދަޅު ގަންނަން ދައުލަތުން 79.4 މިލިއަން ރުފިޔާ ރައްޔިތުންނަށްޓަކައި ހޭދަކުރި ކަމަށް ފިނޭންސުން ބުނެއެވެ.
ސަރުކާރުން މަސްދަޅު ކޭސް ބެހީ މިފްކޯއިން މަސްދަޅު ކޭސް ގަނެގެނެވެ. އެގޮތުން ބެހީ 180 ގްރާމްގެ 48 ދަޅު ހިމެނޭ ތެޔޮ މަސްދަޅު ކޭހެކެވެ. މަސްދަޅު ކޭސް ސަރުކާރުން ގަތީ 30ރ. ޑިސްކައުންޓަކާ އެކީގަ އެވެ. އެހެންވެ ކޮންމެ މަސްދަޅު ކޭހަކަށް ހަރަދުކުރީ 730ރ. އެވެ.
ރޯދަ ހަދިޔާއެއްގެ ގޮތުގައި މަސްދަޅު ކޭހުގެ އިތުރުން ކަރަންޓާއި ފެން ބިލުން ވެސް ސަރުކާރުން ޑިސްކައުންޓް ދިނެވެ.