އައްޑޫ ހިތަދޫ އާރިކިޅި ތެރެއިން މިއަދު ފެނުނު މީހާ އޮތީ މަރުވެފައި ކަމަށް ހޮސްޕިޓަލާ ހަވާލާދީ ފުލުހުން ބުނެފި އެވެ.
ކުޅި ތެރެއިން މީހެއްގެ ހަށިގަނޑު ފެނިގެން ފުލުހުންނަށް ރިޕޯޓްކޮށްފައި ވަނީ ހެނދުނު 9:33 އެހާކަށް އިރު އެވެ. އެއާއާ އެކު ހަށިގަނޑު ނަގައިގެން އައްޑޫ އިކްއެޓޯރިއަލް ހޮސްޕިޓަލް (އޭއީއެޗް) ގެންދިޔަ އެވެ.
އެތަނުގެ ޑޮކްޓަރުންނާ ހަވާލާދީ ފުލުހުން ބުނީ އެ މީހާ އޮތީ ގެންދިޔަ އިރު ވެސް މަރުވެފައި ކަމަށެވެ.
ކުޅި ތެރެއިން ފެނުނީ ހުދު ޓީޝާޓަކާއި ކަޅު ސޯޓެއް ލައިގެން އޮތް ފިރިހެނެކެވެ. އެނގިފައިވާ ގޮތުގައި އެއީ ބިދޭސީއެކެވެ. އެ މީހާގެ ހަށިނޑު ފެނުނީ އައްޑޫ ހައި ސްކޫލް ފުރަގަހުން އާރިކިޅި ބްރިޖް ސަރަހައްދުންނެވެ.
ނަމަވެސް މި ހާދިސާއާ ގުޅިގެން ފުލުހުން އިތުރު އެއްވެސް ތަފުސީލެއް ނުދެ އެވެ. އެކަމަކު މިކަން އިތުރަށް ބަލަމުން އަންނަ ކަމަށް ފުލުހުން ބުންޏެވެ.
އެނގިފައިވާ ގޮތުގައި މަރުވި މީހާ އަކީ ހިތަދޫގެ ރެސްޓޯރަންޓެއްގައި ކޭޝިއަރެއްގެ ގޮތުގައި މަސަައްކަތް ކުރަމުން އައި މީހެކެވެ.