ބޮލީވުޑްގެ ތަރި ރަންވީރު ސިންގް ޒޮމްބީ ފިލްމެއް ހަދަން ތައްޔާރުވަމުން އަންނަ ކަމަށް ރިޕޯޓްތައް ބުނެފި އެވެ.
ބޮލީވުޑްގެ ޚަބަރުތައް ގެނެސްދޭ މީޑިއާތަކުން ބުނީ މި ފިލްމަކީ އޭނަގެ އަމިއްލަ ޕްރޮޑަކްޝަން ހައުސް 'މާ ގަސަމް' އިން ހަދަން ނިންމާފައިވާ އެއްޗެއް ކަމަށާއި މީގެ ޑައިރެކްޓަރަކީ ޖޭ މެހެތާ ކަމަށެވެ. ޕިންކްވިލާ އިން ބުނި ގޮތުގައި ޒޮމްބީ ޕްރޮޖެކްޓް އަދި އޮތީ ސްކްރިޕްޓިން މަރުހަލާގައި ކަމަށާއި ސްކްރިޕްޓް މި އަހަރު ނިމުމުގެ ކުރިް ފައިނަލް ކުރާނެ ކަމަށެވެ.
ނަމަވެސް މި ފިލްމު ރަންވީރު ކުޅޭނެ ކަމެއް ނުވަތަ ހަމައެކަނި ޕްރޮޑިއުސްކުރާނީ ކަމެއް ނޭނގެ އެވެ.
މަޝްހޫރު ބަތަލާ ދީޕިކާ ޕަދްކޯންގެ ފިރިމީހާ މިހާރު އަންނަނީ ޑައިރެކްޓަރު އަދިތިޔާ ދާރުގެ ވަތަނީ ފިލްމު "ދުރަންދާރު" ގެ މަސައްކަތް ކުރަމުންނެވެ. ރަންވީރު އެންމެ ފަހުން ފެނިފައި ވަނީ ކަރަން ޖޯހަރްގެ 2023 ގެ "ރޮކީ އޯރް ރާނީ ކީ ޕްރޭމް ކަހާނީ" އިންނެވެ.
މި އަހަރުގެ އޮކްޓޯބަރު މަހުގެ ތެރޭގައި އޭނަ ،ޑައިރެކްޓަރު ފަރުހާން އަޚްތަރުގެ "ޑޮން 3" ގެ މަސައްކަތް ފަށާނެ އެވެ.
ރަންވީރު ޒޮމްބީ ފިލްމެއް ހަދަން ތައްޔާރީތައްވަމުން އަންނަ އިރު، މި ޖޯންރާ އަކީ ބޮލީވުޑާ އެހާ ރައްޓެހި ޖޯންރާއެއް ނޫނެވެ. ބޮލީވުޑުން މިހާތަނަށް ގެނެސްދިން އެންމެ ފާހަގަކޮށްލެވޭ ޒޮމްބީ ފިލްމަކީ ސައިފް އަލީ ޚާނާ އެކު، ޑައިރެކްޓަރުން ކަމަށްވާ ރާޖް އެންޑް ޑީކޭ 2013 ގައި ގެނެސްދިން ޒޮމްބީ އެކްޝަން ކޮމެޑީ "ގޯ ގޯއާ ގޯން" އެވެ.
އޭގެ ދެވަނަ ބައެއް ހެދުމުގެ ވާގަކަތަކެއް ވެސް އޮތީ ދެކެވިފަ އެވެ.