ގދ. ހޯނޑެއްދޫގެ އެކި ތަންތަނުގައި އަލިފާން ރޯކޮށް ހުޅުޖެހުން މިހާރު ޢާންމު ކަމަކަށް ވެފައިވާތީ ކައުންސިލުން ކަންބޮޑުވުން ފާޅުކޮށްފި އެވެ.
ކައުންސިލުން ނެރުނި ބަޔާނެއްގައި ބުނީ މިކަމަކީ އަލިފާނުގެ ނުރައްކާތެރި ހާދިސާތައް ހިނގުމަށް މަގުފަހިވެދާނެ ޢަމަލެއް ކަމަށާއި މިކަމުގެ ސަބަބުން ދަނޑުބިންތަކާއި ރައްޔިތުންގެ ރުއްގަހާއި މުދަލަށް ބޮޑެތިގެއްލުންތަކެއް ލިބިގެން ދިއުމުގެ ފުރުޞަތު ވެސް އޮތް ކަމަށެވެ. އަދި އަލިފާން ރޯކޮށް، އެ އަލިފާނުގެ ސަބަބުން އުފެދޭ ދުމުން އަވަށްޓެރިންނަށް އުނދަގޫވާ ގޮތަށް އަލިފާން ރޯކުރުމަކީ އާންމު އުނދަގުލާ ބެހޭ ގަވާއިދުގެ ދަށުން މަނާ ކަމެއްކަން ވެސް ހޯނޑެއްދޫ ކައުންސިލުން ހަނދާންކޮށް ދީފައިވެ އެބެ.
އެ ކައުންސިލުން ބުނީ ގަވާއިދާ ޚިލާފަށް އެކަށީގެންވާ ރައްކާތެރިކަމުގެ ފިޔަވަޅު އެޅުމެއް ނެތި، އާންމު ތަންތާގައި އަލިފާން ރޯކުރުމަކީ މަނާ ކަމަކަށްވާތީ، މިއަދުން ފެށިގެން ހޯނޑެއްދޫގެ އެއްވެސް ތަނެއްގައި އަލިފާން ރޯކޮށް، ހުޅު ޖަހާ ނަމަ އެކަން ކުރާ ފަރާތްތަކަށް ގަވާއިދުގެ ދަށުން ފިޔަވަޅު އަޅަމުން ދާނެ ކަމަށެވެ.