Last Updated: April 3, 13:43
Thursday, April 3, 2025
މުނިފޫހިފިލުވުން

ބަތަލާ ޖެކްލީންގެ މަންމަ މަރުވެއްޖެ

ބޮލީވުޑްގެ ބަތަލާ ޖެކްލީން ފެނާންޑޭޒްގެ މަންމަ މަރުވެއްޖެ އެވެ.

މެލޭޝިއާ އަށް ނިސްބަތްވާ ކިމް ފަނޭންޑޭޒް މިއަދު މަރުވީ މިދިޔަ މަހުގެ 24 ގައި ސްޓްރޯކެއް ޖެހިގެން މުމްބާއީގެ ލީލާވަތީ ހޮސްޕިޓަލްގެ އައިސީޔޫގައި އެޑްޓްމިޓްކޮށް ފަރުވާ ދެމުން ދަނިކޮށެވެ. ދެހާސް ނުވައެއްގެ ފިލްމު "އަލައްދިން" އިން ބޮލީވުޑަށް ނުކުމެ މިހާތަނަށް ކާމިޔާބު ފިލްމުތަކެއް ކުޅެފައިވާ ޖެކްލީންގެ ބައްޕަ އެލްރޯއި ފެނާންޑޭޒަކީ ސްރީ ލަންކާގެ މީހެކެވެ.

ޖެކްލީން، 39، އަކީ އޭނަގެ މައިންބަފައިންނަށް ލިބުނު ހަތަރު ކުދިންގެ ތެރެއިން އެންމެ ހަގު ކުއްޖާ އެވެ. އެ އާއިލާގައި ހިމެނެނީ ދެ އަންހެން ކުދިންނާއި ދެ ފިރިހެން ކުދިންނެވެ.

ޖެކްލީން އަކީ 2006 ގެ ލަންކާ ރީތީގެ މުބާރާތް ކާމިޔާބުކޮށް، އެ އަހަރުގެ މިސް ޔުނިވާސްގައި ލަންކާ ތަމްސީލު ވެސް ކުރި މީހާ އެވެ.

ޖެކްލީންގެ އެންމެ ފަހުގެ ފިލްމަކީ ޖެނުއަރީގައި ރިލީޒްކުރި ސޯނޫ ސޫދުގެ "ފަތޭ" އެވެ.