ދުންފަތް މަނާކުރަން ވިސްނަވަނީ 25 އަހަރުން ދަށުގެ މީހުންނަށް ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެ އެވެ.
އެމަނިކުފާނުގެ "ރައްޔިތުންނާ އެކު" ޕޮޑްކާސްޓްގެ ދެވަނަ އެޕިސޯޑްގައި މިއަދު ވިދާޅުވީ ރާއްޖޭގައި ދުންފަތުގެ އިސްތިއުމާލުކުރުން ހުއްޓުވުމަކީ ބޭނުންވާ ކަމެއް ކަމަށެވެ. އެގޮތުން ދިވެހި ޅަދަރިން ދުންފަތުގެ ނުރަނގަޅު އާދައިގެ ތެރެއަށް ދޫކޮށްލައިގެން ސަރުކާރެއް އޮންނަން ޖެހޭ ކަމަށް ގަބޫލުނުކުރާ ކަމަށާއި ދުންފަތުގެ އިސްތިއުމާލުކުރުން އާދައަކަށް ނުވަނީސް އެކަން ހުއްޓުވަން ޖެހޭ ކަމަށް ރައީސް ވިދާޅުވިއެވެ.
މި މައްސަލަ ހައްލުކުރުމަށް "ޖެނެރޭޝަން ބޭން" އެއް މުހިންމު ކަމަށާއި ކަމާބެހޭ ފަރާތްތަކާ މަޝްވަރާކޮށް، ދިރާސާކުރުމަށް ފަހު ކެބިނެޓް ކަރުދާހެއް ތައްޔާރުކުރެއްވުމަށް ސިއްޙީ ވަޒީރަށް އިރުޝާދު ދެއްވާފައިވާނެ ކަމަށް ވިދާޅުވިއެވެ. އެގޮތުން، ތިން ގޮތަކަށް ދުންފަތް ހުއްޓުވުމަށް ހުށަހެޅުއްވުމަށް ވިސްނަވާ ކަމަށް ވިދާޅުވިއެވެ.
ރައީސް ވިދާޅުވީ ކުރިއަށް އޮތް ޖީލު، ދުންފަތުން ސަލާމަތް ކުރުމަށް ޤާނޫނެއް ހެދުމަށް ނިންމަވާފައިވަނީ 2000 ވަނަ އަހަރުން ފެށިގެން ނުވަތަ 2004 ވަނަ އަހަރުން ފެށިގެން ނުވަތަ 2007 ވަނަ އަހަރުން ފެށިގެން އުފަންވެފައިވާ އަދި އުފަންވާ ކުދިންނަށް ދުންފަތް މަނާކުރާ ގޮތަށް ކަމަށެވެ.
"އަށާރަ އަހަރާއި ފަންސަވީސް އަހަރާ ދޭތެރޭގައި އަދި އެއީ އެހާ ގިނަ ދުވަހެއް ނޫން. ކުދިން ނުވަތަ ޒުވާނުން އެކަމުގެ ތެރޭގައި އުޅޭތާ،" ރައީސް ވިދާޅުވި އެވެ. "އެ ކުދިން އެ ވަބާއިން ސަލާމަތް ކުރަން ފަސޭހަވާނެއޭ ތީރީސް، ސާޅީސް އަހަރުވެފައިވާ މީހުން އެކަމުން ސަލާމަތްކުރަން ބޭން ކުރުމަށް ވުރެ."
ދުންފަތުގެ އިސްތިއުމާލުކުރާ އެހެނިހެން އުމުރުފުރާތަކުގެ މީހުންވެސް އެ އާދަ ދޫކޮށްލުމަށް ރައީސް އިލްތިމާސް ކުރެއްވި އެވެ. އަދި ރާއްޖެއަށް ދުންފަތުގެ ބާވަތްތައް އެތެރެކޮށް، ވިޔަފާރި ކުރާ ފަރާތްތަކުން އެކަން ހުއްޓާލުމަށް ވެސް އިލްތިމާސް ކުރެއްވި އެވެ.
ރައީސް ވިދާޅުވީ މިކަމަށް ކުރެވޭ މަސައްކަތުގައި ހުރިހާ މުއައްސަސާތައް އެއް ލެވެލެއްގައި މަސައްކަތްކޮށްގެން ޤާނޫނު ތަންފީޒުކުރުމުގައި މަސައްކަތް ކުރައްވާނެ ކަމަށާއި އެގޮތަށް ލަފާ ވެސް ދެއްވާފައިވާނެ ކަމަށެވެ.
މީގެ އިތުރުން މިފަދަ ކަންކަން ސިޔާސީ ނުކުރަން ވެސް ރައިސް ގޮވާލެއްވި އެވެ.