އައްޑޫގެ ގުޅިފައިވާ އަވަށްތަކުން ކަރަންޓް ކެނޑޭ މައްސަލަ ހައްލު ކުރަން އެންމެ ފަހުން ގެނައި 1.8 މެގަވޮޓްގެ ޖަނަރޭޓަރު ބޭނުން ކުރަން ފެށިތާ ދެ ދުވަސް ފަހުން އަނެއްކާ ވެސް ކަރަންޓް ކަނޑަން ފަށައިފި އެވެ.
ފެނަކަ އިން ބުނެފައި ވަނީ އެ ޖަނަރޭޓަރު ބޭނުން ކުރަން ފެށުމުން ދެން ކަރަންޓް ކަނޑަން ނުޖެހޭނެ ކަމަށެވެ.
ނަމަވެސް ހިތަދު އާއި މަރަދު އާއި މަރަދޫފޭދޫގެ އިތުރުން ފޭދޫގެ އެކި ސަރަހައްދުތަކުން ގަޑިއެއްހާ އިރަށް މިއަދު ވަނީ ކަރަންޓް ކަނޑަން ފަށައިފަ އެވެ. މިކަމާ ގުޅިގެން ވަރަށް ގިނަ ބަޔަކު މިހާރު އަންނަނީ ސޯޝަލް މީޑިއާގައި ކަންބޮޑުވުން ފާޅުކުރަމުންނެވެ.
ބައެއް މީހުން ބުނެފައި ވަނީ މުޅިން އާ އެއްޗެއް ކަމަށް ބުނެ އައްޑު އަށް އެންމެ ފަހުން ގެނައީ ބާވެފައިވާ ޖަނަރޭޓަރެއް ކަމަށް ބުނެ ދެކެވޭ ވާހަކަތަކަށް މިހާރު މިކަމުން ބާރު ލިބޭ ކަމަށެވެ. އަދި ފެނަކަ އިން އައްޑޫ ރައްޔިތުންނަށް ޖެއްސުން ކުރަމުންދާ ކަމަށް ބުނެފައިވެ އެވެ.
އައްޑޫން ކަރަންޓް ކެނޑޭ މައްސަލަ ހައްލު ކުރަން ފާއިތުވި ދެ މަހެއްހާ ދުވަހުގެ ތެރޭގައި ހަތަރު ޖަނަރޭޓަު ގެނެސްފައިވާ އިރު، ގުޅިފައިވާ އަވަށްތަކަށް ކަރަންޓްދޭ މަރުކަޒީ އިންޖީނުގޭގައި މިހާރު ހުރި ޖަނަރޭޓަރުތަކުގެ އަދަދު 19 އަށް އަރަ އެވެ. ނަމަވެސް އެ އެއްޗެހީގެ ހާލަތު ދަށްކަމުން ބޭނުންވާ ވަރަކަށް ކަރަންޓެއް ނުއުފެއްދެ އެވެ.
ފެނަކަ އިން ބުނީ އައްޑޫގެ ޕީކް ގަޑިތަކުގައި ކަރަންޓް ލޯޑް 11.6 މެގަވޮޓަށް އަރާ ކަމަށެވެ،