ކުރިން ވެސް އެކީގައި ފިލްމުތަކެއް ކުޅެފައިވާ ބޮލީވުޑްގެ ތަރިން ކަމަށްވާ ސަލްމާން ޚާނާއި ސަންޖޭ ދަތު އެކީގައި ކުޅެން ތައްޔާރުވަމުން އަންނަ އާ ފިލްމުގެ ނަމަކީ "ގަންގާ ރާމް" ކަމަށް ރިޕޯޓްތައް ބުނެފި އެވެ.
ބޮލީވުޑް ހަންގާމާ އިން ބުނީ މިއީ ސަލްމާންގެ ކުންފުނި، އެސްކޭއެފުން އުފައްދާ އެކްޝަން ފިލްމެއް ކަމަށާއި މީގެ ޑައިރެކްޓަރަކީ އަލަށް ޑައިރެކްޝަނަށް ނުކުންނަ ކްރިޝް އާހިރު ކަމަށެވެ. އޭނަ މިހާތަނަށް އެސްކޭއެފުން ގެނެސްދިން އެކި ފިލްމުތަކުގައި އެސިސްޓެންޓް ޑައިރެކްޓަރެއްގެ ގޮތުގައި މަސައްކަތްކޮށްފައިވެ އެވެ.
ހަންގާމާ އިން ބުނި ގޮތުުގައި "ގަންގާ ރާމް" ގެ ޝޫޓިން ޖޫން/ޖުލައި ހިސާބުގައި ފަށާނެ އެވެ.
ސަލްމާން ދާދި ފަހުން ބުނި ގޮތުގައި އޭނަގެ އަތުގައި މި ވަގުތު ދެ ފިލްމެއް އޮތް އިރު، ދެން ކުޅޭނީ ކޮން ފިލްމެއްކަން ވަރަށް އަވަހަށް އިއުލާން ކުރާނެ އެވެ. އޭނަގެ އެންމެ ފަހުގެ ފިލްމަކީ މިދިޔަ މަހުގެ 30 ގައި ރިލީޒްކުރި "ސިކަންދަރު" އެވެ.
ސަލްމާނާއި ސަންޖޭ ކުރިން އެކީގައި ކުޅުނު ފިލްމުތަކުގެ ތެރޭގައި "ސާޖަން" އާއި "ޗަލް މެރެ ބާއީ" ހިމެނެ އެވެ. މި ދެ ތަރިން ދާދި ފަހުން ހޮލީވުޑްގެ ޕްރޮޖެކްޓެއްގެ ކެމިއޯތަކަށް ޝޫޓްކޮށްފައިވެ އެވެ.
ސަންޖޭގެ ކުރިއަށް އޮތް ފިލްމަކީ މި މަހުގެ 18 ގައި ރިލީޒްކުރާ ހޮރޯ-ކޮމެޑީ "ދަ ބޫތުނީ" އެވެ.