ގިނަ ޒުވާނުން އެންމެ ގިނައިން ކުރާ ސުވާލަކީ، އެބައި މީހުންގެ އީމާންތެރިކަން ބަލިކަށިވާތީ، އީމާންތެރިކަން ވަރުގަދަ ކުރެވޭނީ ކިހިނެއްތޯ އެވެ؟
ވަރަށް ގިނައިން މާތް ﷲ އަށް އަޅުކަންކޮށްފައި އުޅޭ މުސްލިމުން ވެސް، ދުވަސްތަކެއް ފަހުން އެކަން ހުއްޓާލައި، ދީނާއި ދުރުހެލިވެ އެވެ. އަދި އަލަށް އިސްލާމް ދީނަށް ވަންނަ ވަރަށް ގިނަ މީހުންވެސް ބުނާ އެއް ވާހަކަ އަކީ، އެމީ ހުން ވެސް މުސްލިމަކު ކަމުގައިވީ ފުރަތަމަ ދުވަސްކޮޅު ނުހަނު ބޮޑަށް ދީނާ މެދު އުޅެވުނު ކަމަށާއި ނަމަވެސް ފަހަކަށް އައިސް ދީނީ ކަންކަމާއި ދުރުވެވޭ ކަމަށެވެ. ފުރަތަމަ ދުވަސްކޮޅު ލިބުނު އުފަލާއި ހިތްހަމަ ޖެހުން ފަހުން ނުލިބުމުން އެކަމާއި ކަންބޮޑުވާ ވާހަކަ އާއި އެއުފާވެރިކަން އަލުން ލިބެން ބޭނުންވާ ކަމަށް ވެސް އެ މީހުން ބުނެ އެވެ.
އީމާންތެރިކަން ބަލިކަށިވަމުން އަންނަކަމަށް ބުނާ މީހުން ގާތު އެންމެ ފުރަތަމަ ވެސް އަހަރެން އަހާލަން ބޭނުންވާ ސުވާލަކީ، މާތް ﷲ އާއި އެފަދަ މީހުންނާ ދެމެދު ގުޅުން އޮތީ ކިހާވަރަކަށްތޯ އެވެ؟ އެގުޅުން ވަރުގަދަތޯ، ނޫންނަމަ ގުޅުން ކޮންމެވެސް ވަރަކަށް ނަމަވެސް ހީނަރުވެފައިވޭތޯ އެވެ؟
އެންމެ ފަހުން ދަންވަރު ގަޑީގައި ތެދުވެ، ދަމު ނަމާދެއް ކުރީ ކޮން އިރަކުތޯ އެވެ؟ ނުވަތަ އެހެން ވެސް ސުންނަތް ނަމާދެއް އެންމެ ފަހުން ކުރީ ކޮންއިރަކުތޯ އެވެ؟ ގިނަ މީހުންގެ ޖަވާބަކަށްވަނީ، ފަހަކަށް އައިސް އެކަން ނުކުރެވޭ ކަމަށާއި، އެންމެ ގިނަ ވެގެން ވެސް ކުރެވެނީ ފަރުޟު ފަސް ނަމާދު ކަމަށެވެ. ގިނަ ފަހަރަށް އެ ފަސް ނަމާދު ވެސް ކޮންމެ ދުވަހަކުމެ ކުރެވެނީ މަދު ދުވަސްތަކެއްގައި ކަމަށް ވެސް އެ މީހުން ބުނެ އުޅެ އެވެ.
އެހެންކަމުން، ދެން އަހަރެން އެމީހުންގާތު ކުރާ ސުވާލަކީ، މާތް ﷲ އާއި ދެމެދު އޮތް ގުޅުން ކެނޑެމުން އަންނަ ކަމުގައިވާ ނަމަ، އީމާންތެރިކަން ވަރުގަދަ ވާނީ ކިހިނެއްތޯ އެވެ. ތިމާ މީހާގެ އީމާންތެރިކަން އަމިއްލަ އަށް ހުރެ ރަނގަޅެއް ނުވާނެ އެވެ. ވަރުގަދައެއް ވެސް ނުވާނެ އެވެ. ފުރިހަމަ ރަނގަޅު މުސްލިމަކަށް ވުމަށްޓަކައި ތިމާ އަމިއްލައަށް ފިޔަވަޅުތަކެއް ފުރަތަމަ ވެސް އަޅަން ޖެހެ އެވެ.
ރަސޫލާ صلى الله عليه وسلم ގެ ސަޙާބީން ވެސް ވީހާވެސް ގިނަ ވަގުތު އަޅުކަމުގައި ހޭދަ ކުރައްވަވަނީ މިސަބަބާއި ހެދިއެވެ. މާތް ﷲ އާއި ދެމެދު އޮންނަ ގުޅުން ވީހާވެސް ބޮޑަށް ގަދަފަދަ ކުރެއްވުމަށެވެ. އަދި އެކަލާނގެއަށް އަޅުކަން ކުރުމުގައި އެބޭކަލުން ދުވަހަކުވެސް މެދުކަނޑާ ނުލައްވަވައެވެ. ރަސޫލާ صلى الله عليه وسلمގެ އަސްޙާބު ބޭކަލެއް ކަމުގައިވާ ރަބީއާ (ރަޟިއަﷲ އަންހު)، އެކަލޭގެފާނު ވުޟޫ ކުރެއްވުމަށް ފެންފޮދެއް އެއްދުވަހު ގެންގޮސް ދެއްވިއެވެ. ރަބީއާގެފާނު ކޮންމެވެސް ކަމެއް ބޭނުންފުޅުވާކަން ރަސޫލާ صلى الله عليه وسلمއަށް އެނގިވަޑައިގެން ޙަދީޘްފުޅު ކުރެއްވެވިއެވެ. ”ޔާ ރަބީއާ. ކަލޭގެފާނު ތިޔަ ބޭނުންފުޅުވަނީ ކޮން ކަމެއްތޯއެވެ. ވިދާޅުވާށެވެ.”
ރަބީއާގެފާނު ދެންނެވިއެވެ. ”ރަސޫލާ صلى الله عليه وسلم، ކަލޭގެފާނުގެ އަސްޙާބު ބޭކަލެއްގެ ގޮތުގައި ސުވަރުގޭގައި ވެސް ވުމަށް ތިމަން އެދިލައްވަމެވެ” އެހިނދު އެކަލޭގެފާނު ޙަދީޘްފުޅު ކުރެއްވެވި އެވެ. “އިތުރު ކަމެއް ބޭނުންފުޅު ވޭތޯއެވެ.” ރަބީއާގެފާނު ދެންނެވިއެވެ. ”ނޫނެކެވެ. މާތް ރަސޫލާ صلى الله عليه وسلم އެވެ. ތިމަން ބޭނުންފުޅުވެލައްވަނީ ހަމައެކަނި އެކަމެވެ.” އެހެންކަމުން ރަސޫލާ صلى الله عليه وسلم ޙަދީޘްފުޅު ކުރެއްވެވިއެވެ. ” ތިހެންކަމުގައިވާނަމަ، ކަލޭގެފާނަށް އެހީތެރިވުމަށް ތިމަން ކަލޭގެފާނަށް އެހީތެރިވެދެއްވާށެވެ. ކަލޭގެފާނު އެކަލާނގެ ޙަޟްރަތައް ސަޖިދަ ޖެހުން އިތުރު ކުރައްވަވާށެވެ.”
އޭގެ މާނައަކީ، އަޅުކަން ކުރުން އިތުރު ކުރައްވަވާށެވެ. ނަމާދު ގާއިމް ކުރުން އިތުރު ކުރައްވާށޭއެވެ.
އޭގެން ވެސް ދޭހަވަނީ، އެކަލާނގެ އާއި އެކަލާނގެ އަޅާއާ ދެމެދުގައިވާ ގުޅުން ވަރުގަދަކޮށްފި ނަމަ، އީމާންތެރިކަން ވެސް ވަރުގަދަ ވާނެކަމެވެ.
މަސްދަރު: އިލްމު.އެމްވީ