އެތުލެޓިކޯ މެޑްރިޑް 1-0 އިން ބަލިކުރުމަށްފަހު ސްޕެނިޝް ކަޕްގެ ފައިނަލުގެ ފަހު ޖާގަ ބާސެލޯނާ އިން ހޯދައިފި އެވެ.
ބާސާގެ ދަނޑުގައި މި ދެ ޓީމު ބައްދަލުކުރި ސެމީފައިނަލްގެ ފުރަތަމަ ލެގުގެ މެޗު ނިމުނީ 4-4 އިން އެއްވަރުވެގެންނެވެ. ބާސާ ފައިނަލަށް ދަތުރުކުރީ 5-4 ގެ އެގްރިގޭޓް ނަތީޖާއަކުންނެވެ.
ފައިނަލްގައި ބާސާ ބައްދަލުކުރާނީ ރެއާލް މެޑްރިޑާ އެވެ. ފައިނަލް އޮންނާނީ މި މަހުގެ 26 ވަނަ ދުވަހު އެވެ.
އެތުލެޓިކޯގެ ދަނޑުގައި ރޭ ކުޅުނު މެޗުގައި ފެނިގެންދިޔަ ހަމައެކަނި ގޯލު ބާސާއަށް މެޗުގެ 27 ވަނަ މިނެޓްގައި ކާމިޔާބުކޮށްދިނީ ފެރަން ޓޮރޭސް އެވެ. މިއީ ލަމީން ޔަމާލް ދިން ރީތި ޕާހަކުން އެތުލެޓިކޯގެ އޭރިއާ ތެރޭ ހުރެ ފޮނުވާލި ހަމަލާއަކުން ޓޮރޭސް ކާމިޔާބުކުރި ގޯލެކެވެ.
ލީޑު އިތުރަށް ފުޅާކޮށްލަން ވެސް ބާސާއަށް ފުރުސަތުތަކެއް ލިބުނުއިރު، ނަތީޖާ އެއްވަރުކުރަން އެތުލެޓިކޯ އިން މަސައްކަތް ކުރި ނަމަވެސް އެޓީމަށް އެކަން ކާމިޔާބުވެފައެއް ނުވެ އެވެ.
ބާސާ އަކީ ސްޕެނިޝް ކަޕްގެ އެންމެ ކާމިޔާބު ޓީމެވެ. އެޓީމު ވަނީ މި މުބާރާތް 31 ފަހަރު ކާމިޔާބުކޮށްފަ އެވެ.