ރާއްޖެ އާއި އޭޝިއާގެ ވަރަށް ގިނަ ގައުމުތަކެއްގެ އިތުރުން ޔޫރަޕިއަން ޔުނިއަން (އީޔޫ) ވެސް ހިމެނޭ ގޮތަށް އެތައް ގައުމަކުން އެމެރިކާ އެތެރެ ކުރާ މުދަލުން މިހާރު ނަގާ ޓެރިފް 10 ޕަސެންޓަށް ބޮޑުކޮށް ލިސްޓް އާންމުކޮށްފި އެވެ.
އެ ލިސްޓް އާންމުކުރީ ވައިޓް ހައުސްގެ ރޯޒް ގާޑަންގައި ނޫސްވެރިންނާ އެކު ބޭއްވި ބައްދަލުވުމެއްގަ އެވެ. އެ ބައްދަލުވުމުގައި ޓްރަމްޕް ވަނީ ލިސްޓް އާންމު ކުރައްވައި، އާ ޓެރިފަށް މި މަހުގެ 5 އިން ފެށިގެން އަމަލު ކުރަން ފަށަން ނިންމާފައިވާތީ އެކަމުގެ އަމުރުގައި ސޮއި ވެސް ކުރައްވައިފަ އެވެ.
— The White House (@WhiteHouse) April 2, 2025
މިދިޔަ ޖެނުއަރީ މަހުގެ ތެރޭގައި ޓްރަމްޕް ވެރިކަމަށް ވަޑައިގަތް ފަހުން އެކި ގައުމުތަކުން އެމެރިކާ އަށް އެތެރެކުރާ މުދަލަށް ނަގާ ޓެރިފް ބޮޑު ކުރަން ފެއްޓެވި އެވެ. އެގޮތުން އެންމެ ފުރަތަމަ ޓެރިފް ބޮޑުކުރި ގައުމުތަކުގެ ތެރޭގައި ކެނެޑާ އާއި ޗައިނާ ފާހަގަކޮށްލެވެ އެވެ.
ޓެރިފް ބޮޑުކުރި ލިސްޓްގައި ހިމެނޭ އޭޝިއާގެ ބައެއް ގައުމުތައް:
* ރާއްޖެ: 10 ޕަސެންޓް
* ޗައިނާ: 34 ޕަސެންޓް
* އިންޑިއާ: 26 ޕަސެންޓް
* ސްރީ ލަންކާ: 44 ޕަސެންޓް
* ޕާކިސްތާން: 25 ޕަސެންޓް
* ބަންގްލަދޭޝް: 37 ޕަސެންޓް
* މެލޭޝިއާ: 24 ޕަސެންޓް
* ޖަޕާން: 24 ޕަސެންޓް
* އިންޑޮނީޝިއާ: 32 ޕަސެންޓް
* ސިންގަޕޫރް: 10 ޕަސެންޓް
* ތައިލޭންޑް: 36 ޕަސެންޓް
ޓްރަމްޕް ވިދާޅުވީ ޓެރިފް ބޮޑު ކުރުމަކީ އެމެރިކާގެ ތާރީހުގައި ވެސް އެޅުނު މުހިއްމު ފިޔަވަޅެއް ކަމަށާއި މީގެ ސަބަބުން އެކި ގައުމުގެ އިގުތިސާދަށް އިތުރު ކުރިއެރުންތަކެއް އަންނާނެ ކަމަށެވެ.
— Rapid Response 47 (@RapidResponse47) April 2, 2025
ޓްރަމްޕް ވިދާޅުވި ގޮތުގައި ގައުމުތަކުން އެމެރިކާ އަށް އެތެރެކުރާ މުދަލުން ނަގާ ޓެރިފް ބޮޑު ކުރުމުގެ ނަތީޖާއަކަށް ވާނީ އެ ގައުމުތަކުގެ ކުންފުނިތަކުގެ މަސައްކަތްތައް އެމެރިކާ އަށް އައުން ކަމަށެވެ. އޭގެ ސަބަބުން އެމެރިކާގައި ކުރެވޭ އިންވެސްޓްމަންޓްތައް އިތުރުވެ ވަޒީފާގެ އެތައް ފުރުސަތުތަކެއް ވެސް ފަހިވުން ކަމަށް ޓްރަމްޕް ވިދާޅުވި އެވެ.