އައްޑޫގައި ގެސްޓްހައުސްތަކާއި ސިޓީ ހޮޓާތައް ތަރައްގީކޮށް ހިންގަން ޝައުގުވެރިވާ ފަރާތްތަކަށް އައްޑޫގެ ހަތަރު އަވަށެއްހެ ޓޫރިޒަމް ޒޯންތަކުން ހުޅުވައުލި ބިންތަކަށް ޝައުވެރިވާ ފަރާތްތަކަށް ބީލަން ހުށަހެޅުމުގެ މުއްދަތު މި މަހުގެ 15 އާ ހަމައަށް އިތުރުކޮށްފި އެވެ.
ހިތަދު އާއި ފޭދު އާއި މީދޫގެ އިތުރުން ހުޅުދޫގެ ޓޫރިޒަމް ޒޯންތަކުން ޖުމްލަ 40 ބިމަކަށް ކުރިމަތިލާން އެންމެ ފަހުން ހުޅުވައިލީ މިދިޔަ ފެބްރުއަރީ މަހުގެ 25 ގަ އެވެ. އެކަން ހުޅުވައިލީ ރާއްޖެ އާއި ރާއްޖެ އިން ބޭރުގެ ފަރާތްތަކަށް ވެސް ކުރިމަތިލެވޭ ގޮތަށެވެ.
ހިތަދޫ ޓޫރިޒަމް ޒޯނުން ޖުމްލަ 13 ބިމަކަށް ބީލަން ހުށަހެޅުމުގެ ފުރުސަތު ހުޅުވާލާފައިވާ އިރު، އޭގެ ތެރޭގައި ހިމެނެނީ ގެސްޓްހައުސްތަކަށް ދޫކުރާ އަށް ބިމަކާއި ސިޓީ ހޮޓާ ހެދުމަށް ދޫކުރާ ތިން ބިމެއް ކަމަށެވެ.
ފޭދޫ ޓޫރިޒަމް ޒޯނުން ދޫކުރަނީ ގެސްޓްހައުސް ހަދަން ތިން ބިމެކެވެ.
މީގެ އިތުރުން ހުޅުދޫން ޖުމްލަ 15 ބިމަކަށް ހުޅުވާލާފައިވާ އިރު، މީގެ ތެރޭގައި ހިމެނެނީ ގެސްޓްހައުސް އަށް ދޫކުރާ 13 ބިކަމާއި ސިޓީ ހޮޓާ ހަދަން ދޫކުރާ ދެ ބިމެކެވެ. އަދި މީދޫން ނުވަ ބިމަކަށް ވަނީ ހުޅުވާލައިފަ އެވެ. އޭގެ ތެރޭގައި ހިމެނެނީ ގެސްޓްހައުސް ހަދަން ދޫކުރާ އަށް ބިމަކާއި ސިޓީ ހޮޓާ ހަދަން ދޫކުރާ ބިމެކެވެ.
އައްޑޫގެ ހަތަރު އަވަށެއްގެ ޓޫރިޒަމް ޒޯންތަކުގައި ގެސްޓްހައުސްތަކާއި ސިޓީ ހޮޓާތައް ތަރައްގީ ކުރަނީ 50 އަހަރުގެ މުއްދަތަށެވެ.
ކުރިން އޮތް ގޮތުން ހިތަދު އާއި ފޭދޫގެ ބިންތަކަށް ބީލަން ހުށަހަޅާ ފަރާތްތަކުން ބީލަމަށް ހުށަހެޅުމާއި ބީލަން ހުޅުވުން ބާއްވަން އޮތީ މި މަހުގެ 6 ގަ އެވެ. އަދި މީދު އާއި ހުޅުދޫގެ ބިންތަކަށް ބީލަން ހުށަހެޅުން އޮތީ މި މަހުގެ 7 ގަ އެވެ.
ނަމަވެސް މިހާރު ހަތަރު އަވަށުގެ ބިންތަކަށް ވެސް ބީލަން ހުށަހެޅުމާއި ހުޅުވުން އޮންނާނީ މި މަހުގެ 15 ގަ އެވެ. އެގޮތުން ހިތަދޫގެ ބީލަންތައް ހުޅުވުން އޮންނާނި އެ ދުވަހުހެ ހެނދުު 10:00 ގަ އެވެ. ފޭދޫގެ ބީލަން ހުޅުވުން އޮންނާނީ އެ ދުވަހުގެ ހެނދުނު 11:00 ގަ އެވެ. ހުޅުދޫގެ ބީލަންތައް ހުޅުވާނީ މެންދުރު 12:00 ގަ އެވެ. އަދި މީދޫގެ ބީލަންތައް ހުޅުވުން އޮންނާނީ 15 ވަނަ ދުވަހުގެ މެންދުރު ފަހު 1:00 ގަ އެވެ.
މިކަން ކުރިއަށް ދާނީ ހިތަދޫގައި ހުންނަ ކައުންސިލް އިދާރާގަ އެވެ.
އައްޑޫގެ ޓޫރިޒަމް ޒޯންތަކުން ބިން ދޫކުރި ނަމަވެސް ގިނަ ބިންތަކުގައި މަސައްކަތް ނުފެށި އޮތީ ފަންޑް ހޯދުމުގެ ދަތިތަކާ ހެދި ކަމަށް ގިނަ ފަރާތްތަކަކުންނ ބުނެފައިވެ އެވެ. އެހެންވެ ޓޫރިޒަމް ޒޯންތަކުގައި ފެސިލިޓީތައް ގާއިމު ކުރަން ފަންޑް ހޯދައި ދޭން ބޭންކްތައް މެދުވެރިކޮށް މަސައްކަތްކޮށް ދޭނެ ސަރުކާރުން ބުނެފައިވެ އެވެ.