"ހޮޅުދޫ ބޯޓް" ގައި ރޯވެ އަޑިއަށް ދިޔަ ހާދިސާގައި ގެއްލުނު މީހާ ހޯދުމުގެ މަސައްކަތް ބާރަށް ކުރިއަށްދާ ކަމަށް އެމްއެންޑީއެފުން ބުނެފި އެވެ.
އެ ހާދިސާގައި ގެއްލިފައި ވަނީ ލ. މާވަށަށް ނިސްބަތްވާ ޢަލީ މުޝްފިޤް މުޙައްމަދު ޝަރީފް، 25، އެވެ.
އެމްއެންޑީއެފުން މިއަދު ބުނީ ކޯސްޓްގާޑް ޝިޕް ޢާޒީ، އެފްއައިސީ މާފަތް، އެޗްޕީ 114، ޑައިވަރުންނާއި އެއާ ކޯގެ ޑްރޯން އަދި އެމްއެންޑީއެފް ސެންޓްރަލް އޭރިއާ ކޮމާންޑްގެ ސިފައިން ގުޅިގެން ކަނޑުމަތިންނާއި ޑައިވްކޮށްގެން އަދި ވައިގެ މަގުން އޭނަ ހޯދުމުގެ މަސައްކަތް ކުރިއަށްދާ ކަމަށެވެ.
ތ. ހިރިލަންދޫން ފުރައިގެން މާލެ ދަތުރުކުރަމުން ދަނިކޮށް އަލިފާން ރޯވި "ހޮޅުދޫ ބޯޓް" އަޑިއަށް ގޮސްފައިވަނީ ރޭ މެންދަމު 2:07 ހާއިރު ކަމަށެވެ.
އެ ބޯޓުން 18 މީހަކު ދަތުރުކުރި އިރު އޭގެ ތެރެއިން 17 މީހަކު ވަނީ ސަލާމަތްކޮށްފަ އެވެ. މީހުން ސަލާމަތް ކުރުމުގެ މަސައްކަތުގައި، ތ. އަތޮޅު ޕޮލިސް ސްޓޭޝަނުގެ ފަރާތުން އެމްއެންޑީއެފް ސެންޓްރަލް އޭރިއާ ކޮމާންޑް ކޯސްޓްގާޑަށް ބޮޑު އެހީތެރިކަމެއް ލިބުނެވެ.
އެމްއެންޑީއެފުން ވަނީ ބޯޓުގެ ބައިތައް އޮޔާދާތީ، އެ ސަރަހައްދުން ދަތުރުކުރާ ފަރާތްތަކުން އެކަމަށް ސަމާލުކަން ދިނުމަށް ވެސް އިލްތިމާސްކޮށްފަ އެވެ.