މިދިޔަ މަހުގެ ތެރޭގައި ރާއްޖެ އަށް 200،000 އަށް ވުރެ ގިނަ ޓޫރިސްޓުން އައި ކަމަށް އެންމެ ފަހުގެ ޓޫރިސްޓް އެރައިވަލްސް ތަފާސްހިސާބުތަކުން ދައްކައިފި އެވެ.
އެގޮތުން މިދިޔަ މަހު ޖުމްލަ 203،466 ޓޫރިސްޓުން އައިސްފައިވެ އެވެ. އެހެންވެ މިއީ މިދިޔަ އަހަރުގެ މާޗާ އަޅާބަލާ އިރު، 4.8 ޕަސެންޓްގެ ކުރިއެރުމެކެވެ. މިދިޔަ އަހަރުގެ މާޗް މަހު ރާއްޖެ އައީ 194،227 ޓޫރިސްޓުންނެވެ.
ރާއްޖެ އަށް މި އަހަރުގެ މިހާތަނަށް އެންމެ ގިނަ ޓޫރިސްޓުން އައިސްފައި ވަނީ މިދިޔަ އަހަރު ވެސް އެންމެ ގިނަ ޓޫރިސްޓުން އައި ޗައިނާއިންނެވެ. އެ ގައުމުން މި އަހަރުގެ މިހާތަނަށް 73،997 ޓޫރިސްޓުން އައިސްފައިވެ އެވެ. އެންމެ ގިނަ ޓޫރިސްޓުން އަންނަ ފަސް ގައުމުގެ ތެރޭގައި ދެން ހިމެނެނީ ރަޝިޔާ (66،933 ޓޫރިސްޓުން)، އިނގިރޭސިވިލާތް (65،404 ޓޫރިސްޓުން)، އިޓަލީ (57،955 ޓޫރިސްޓުން) އަދި ޖަރުމަން (44،266 ޓޫރިސްޓުން) އެވެ.
މި މަހުގެ 1 ވަނަ ދުވަހާ ހަމައަށް ރާއްޖެއަށް ޖުމްލަ 632،418 ޓޫރިސްޓުން އަައިސްފައިވެ އެވެ.
ރާއްޖޭގެ މި އަހަރުގެ އަމާޒަކީ 2.3 މިލިއަން ޓޫރިސްޓުން ގެނައުމެވެ. އެ އަމާޒަށް ވާސިލުވުމަށްޓަކައި ރާއްޖެ ޕްރޮމޯޓްކުރަން މިހާރު އަންނަނީ ގިނަ ހަރަކާތްތަކެއް ހިންގަމުންނެވެ.