ޕާކިސްތާންގެ މަޝްހޫރު އެކްޓަރު ފަވާދު ޚާން ކުޅެފައިވާ ބޮލީވުޑްގެ ފިލްމެއް އިންޑިއާގައި އަންނަ މަހު އަޅުވަން ނިންމުމާ ގުޅިގެން އެ ގައުމުގެ ދެ ސިޔާސީ ޕާޓީއަކުން އެ ފިލްމާ ދެކޮޅަށް ނުކުމެއްޖެ އެވެ.
ފަވާދާއި ބޮލީވުޑްގެ ބަތަލާ ވާނީ ކަޕޫރް ކުޅެފައިވާ ރޮމޭންޓިކް ކޮމެޑީ "އަބީރް ގުލާލް" އަންނަ މަހުގެ 9 ގައި ސިނަމާތަކަށް ގެންނަން ނިންމައި، ފިލްމުގެ ޓީމުން އޭގެ ޓީޒާ ދައްކައިލީ މި މަހުގެ 1 ގަ އެވެ.
އެކަމާ ގުޅިގެން ފިލްމާ ދެކޮޅަށް ނުކުމެފައި ވަނީ އިންޑިއާގެ ހަރުކަށި ހިންދޫ ފިކުރުގެ ދެ ޕާޓީއެއް ކަމަށްވާ ޝިވް ސެނާ އާއި މަހާރަޝްތުރާ ނަވްނިރްމަން ސެނާ (އެމްއެންއެސް) އިންނެވެ. އެ ދެ ޕާޓީން ބުނީ ޕާކިސްތާންގެ ފަންނާނަކު ކުޅެފައިވާ ފިލްމެއް މަހާރަޝްތުރާ ސްޓޭޓްގައި އަޅުވަން ފުރުސަތު ނުދޭނެ ކަމަށާއި ފިލްމާ ދެކޮޅަށް ކުރަން ޖެހުނު ކޮންމެ ކަމެއް ކުރާނެ ކަމަށެވެ.
ޝިވް ސެނާ ޕާޓީގެ ލީޑަރު ސަންޖޭ ނިރޫޕަމް ބުނީ ޕާކިސްތާނަށް ނަފުރަތުކުރާ އިންޑިއާ މީހުން ވަރަށް ގިނަ ކަމަށާއި އެ ގައުމުގެ މީހުން ބައިވެރިކޮށްގެން ގެނެސްދޭ އެއްޗެއް އިންޑިއާ މީހުން ބަލަން ވެސް ބޭނުން ނުވާނެ ކަމަށެވެ. އެހެންވެ ފަވާދު ބަތަލުގެ ރޯލު ކުޅެފައިވާ "އަބީރް ގުލާލް" ގެ މައްސަލަ އިންޑިއާގައި ގޯހުން ގޯހަށް ދިއުމުގެ ކުރިން މިކަމާ ގުޅޭ ގޮތުން ސަރުކާރުން، އެ ފިލްމު ދެއްކުމާ މެދު ގޮތެއް ނިންމަން ޖެހޭ ކަމަށް ބުންޏެވެ.
"އެހެން ނޫން ކަމަށް ވަންޏާ އަނެއްކާ ވެސް ގައުމު ވަރަށް ބޮޑު ހަލަބޮލި ކަމަކަށް ހިނގައިދާނެ." ސަންޖޭ ބުންޏެވެ.
އިނގިރޭސިވިލާތުގައި ޝޫޓްކޮށްފައިވާ "އަބީރް ގުލާލް" ގެ ބަތަލުގެ ރޯލު ފަވާދު ކުޅުނަސް މި ފިލްމަކީ އިންޑިއާގެ ބަޔަކު ހަދާފައިވާ ފިލްމެކެވެ. އޭގެ ޑައިރެކްޓަރަކީ އާރްތީ ބަގްޅީ އެވެ.
ފަވާދު ކުރިން ވެސް ބޮލީވުޑްގެ ފިލްމުތަކެއް ކުޅުނެވެ. އެއީ ކުޅުނު 2014 ގެ "ހޫބްސޫރަތު" އާއި 2016 ގެ "ކަޕޫރް އެންޑް ސަންސް" ގެ އިތުރުން އެ އަހަރުގެ "އޭ ދިލް ގެ މުޝްކިލް" އެވެ.
ދެހާސް ސޯޅައިން ފެށިގެން ޕާކިސްތާންގެ ފިލްމީ ތަރިންނަށް އިންޑިއާ އިން ފުރުސަތު ދިނުން ބޮލީވުޑުން ހުއްޓައިލީ އެ އަހަރު ޕާކިސްތާނުން އިންޑިއާ އަށް ދިން ހަމަލާތަކެއްގައި އެ ގައުމުގެ ސިފައިންތަކެއް މަރާލުމާ ގުޅިގެން ދެ ގައުމުން ގުޅުން އިތުރަށް ހޫނުވެ، ޕާކިސްތާންގެ ފަންނާނުން އިންޑިއާ އަށް އެރުމާ ދެކޮޅަށް ފެށުނު ވަރުގަދަ ހަރަކާތްތަކާ ގުޅިގެންނެވެ.
ނަމަވެސް ފާހަގަކޮށްލެވޭ ކަމަކީ ޕާކިސްތާންގެ ފަންނާނުންނަށް އިންޑިއާ އިން އަބަދު ވެސް ގިނަ ފުރުސަތުތަކެއް ދޭ ކަމެވެ. އެގޮތުން އެ ގައުމުގެ ލަވަކިޔުންތެރިން ބޮލީވުޑްގެ ފިލްމުތަކަށް ލަވަ ވެސް ކިޔަ އެވެ.