މިދިޔަ މަހުގެ ފަހުކޮޅު އައި ބިންހެލުމާ ގުޅިގެން ބޮޑެތި ގެއްލުންތަކެއް ލިބިފައިވާ މިއަންމާ އަށް އެއް މިލިއަން ޑޮލަރުގެ އެހީއެއް ދޭން ސްރީ ލަންކާ އިން ނިންމައިފި އެވެ.
ކެބިނެޓްގެ އެ ނިންމުމާ ގުޅޭ ގޮތުން ފޮރިން މިނިސްޓްރީގެ ޑެޕިއުޓީ މިނިސްޓަރު އަރޫން ހެމާޗަންދުރާ ވިދާޅުވީ ފައިސާގެ އެހީގެ އިތުރުން މިއަންމާ އަށް މި ވަގުތު ބޭނުންވާ ޒަރޫރީ ތަކެތި ވެސް ފޯރުކޮށް ދޭން ނިންމާފައިވާ ކަމަށެވެ. އޭގެ ތެރޭގައި ކާބޯތަކެއްޗާއިި ބޭސް ހިމެނެ އެވެ.
މީގެ އިތުރުން މިއަންމާ އިން ސިއްހީ އެހީތެރިން ބޭނުންވާ ހާލަތުގައި އެ އެހީ ވެސް ފޯރުކޮށް ދޭނެ ކަމަށް މިނިސްޓަރު ވިދާޅުވި އެވެ.
މިއަންމާ އަށް ލަންކާ އިން އެހީވާން ނިންމުމާ ގުޅިގެން ތަކެތި ހަދިޔާކުރަން ބޭނުންވާ ފަރާތްތަކަށް ވެސް އެ ފުރުސަތު އޮންނާނެ ކަމަށް ސަރުކާރުން ބުންޏެވެ.
މިދިޔަ މަހުގެ 28 ގައި މިއަންމާ އަށް ރިކްޓާ މިންގަނޑުން 7.7 ބާރު މިނުގައި އައި ބިންހެލުމުގައި މަރުވި މީހުންގެ އަދަދު މިހާރު 3،000 އަށް ވުރެ ގިނަ އެވެ. އެ ހާދިސާގައި 4،500 އަށް ވުރެ ގިނަ މީހުން ޒަހަމްވެފައިވާ އިރި، ގެއްލިފައިވާ މީހުންގެ އަދަދު 350 އަށް ވުރެ ގިނަ އެވެ.