ހަންގޭރީ އިން އިންޓަނޭޝަނަލް ކްރިމިނަލް ކޯޓް (އައިސީސީ) އިން ވަކިވާން ނިންމައިފި އެވެ.
މިކަން މިއަދު އެ ގައުމުގެ ސަރުކާރުން އިއުލާންކޮށްފައި ވަނީ ފަލަސްތީނާ ދެކޮޅަށް ހިންގަމުންދާ ޖަރީމާތަކާ ގުޅިގެން އިޒްރޭލުގެ ބޮޑުވަޒީރު ބެންޖަމިން ނަތަންޔޫއާ ހައްޔަރު ކުރަން މިދިޔަ އަހަރުގެ ނޮވެމްބަރު މަހުގެ ތެރޭގައި އައިސީސީން އަމުރެއް ނެރުމާ އެކު، ހަމްގޭރީ އަށް ވަޑައިގަތުމަށް ނަތަންޔާހޫ އަށް ދިން ދައުވަތާ ގުޅިގެން މިއަދު އޭނަ އެ ގައުމަށް ވަޑައިގަތުމާ އެކީގަ އެވެ.
ހަންގޭރީގެ ބޮޑުވަޒީރު ވިކްޓާ އޮރްބާންގެ އޮފީހުން ބުނީ އެ ގައުމު އައިސީސީން ވަކިވާން މިހާރު ނިންމާފައިވާ ކަމަށެވެ. އަދި އެ ގައުމުން އައިސީސީ ސިފަކޮށްފައި ވަނީ "ސިޔާސީ ކޯޓެއް" ގެ ގޮތުގަ އެވެ.
ހަންގޭރީ އައިސީސީން ވަކިވާން ނިންމި އިރު، އެ ގައުމަކީ އެ ކޯޓް އުފެއްދުމުގައި ހިއްސާވާ ގައުމެކެވެ. އައިސީސީގެ މެންބަރުންގެ ގޮތުގައި މިހާރު 1 125 ގައުމު ހިމެނޭ އިރު، ހަންގޭރީ ވެފައި މި ވަނީ އައިސީސީން ވަކިވާން ނިންމި ޔޫރަޕިއަން ޔުނިއަން އީޔޫ) ގެ ފުރަތަމަ ގައުމަށެވެ.
ހަންގޭރީގެ ނިންމުމަށް ނަތަންޔާހޫ މިއަދު ވަނީ ތައުރީފުކޮށް މަރުހަބާ ވެސް ކިޔައިފަ އެވެ.
އޮރްބާންއާ އެކި ބޭއްވި ނޫސް ކޮންފަރެންސްގައި އޭނަ ބުނީ އައިސީސީ އަކީ ކޮރަޕްޓްވެފައި ޖަމާއަތެއް ކަމަށާއި ޑިމޮކްރަސީ އަށް އިހުތިރާމާއި ލޯބިކުރާ ބަޔަކު އައިސީސީގައި ދެމިނުތިބޭނެ ކަމަށެވެ. އަދި އައިސީސީ އަކީ އިންސާނިއއްޔަތުގެ ހަތުރެއް ކަމަށް ވެސް ބުންޏެވެ.
ނަތަންޔާހޫ އާއި އިޒްރޭލުގެ ކުރީގެ ޑިފެންސް މިނިސްޓަރު ޔޮއާވް ގަލާންޓް ހައްޔަރުކުރަން އައިސީސީން ނޮވެމްބަރު މަހުގެ 21 ގައި ނެރުނު އަމުރު އިސްތިއުނާފު ކުރާނެ ކަމަށް އިޒްރޭލުން ބުނެފައިވެ އެވެ.