މާދަމާ ވެލާނާ އިންޓަނޭޝަނަލް އެއާޕޯޓަށް ބާރުބޮޑުވާނެތީ، ވީހާވެސް އަވަހަށް އެއާޕޯޓަށް ދިއުމަށް އެއާޕޯޓް ހިންގާ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން އިލްތިމާސްކޮށްފި އެވެ.
އެކްސްގައި ކުރި ޕޯސްޓެއްގައި އެމްއޭސީއެލް އިން ބުނީ އުމްރާވެރިން މާދަމާ ރާއްޖެ އައުމަށް ހަމަޖެހިފައިވާތީ ވެލާނާ އިންޓަނޭޝަނަލް އެއާޕޯޓު މަގުތަކާއި ޓާމިނަލް ސަރަހައްދަށް ބާރުބޮޑުވެދާނެ ކަމަށެވެ.
އެގޮތުން ފަސޭހަކަމާއެކު ފުރުމުގެ ކަންކަން ހަމަޖެއްސުމަށްޓަކައި ވީހާވެސް އަވަހަށް އެއާޕޯޓަށް ދިޔުމަށް ވަނީ އެދިފަ އެވެ.
އެމްއޭސީއެލްއިން ވަނީ އުމްރާއިން މީހުން އަންނަ ފްލައިޓުތައް ދެ ގަޑިއެއްގައި އަންނާނެކަން ހާމަކޮށްފަ އެވެ. އެއީ މެންދުރުފަހު 2:00 އާއި ހަވީރު 4:00 ގަ އެވެ.
މިދިޔަ ރަމަޟާން މަހު ޙައްޖު ކޯޕަރޭޝަންގެ ހަވާލުގައި ޖުމްލަ 577 މީހުން ޢުމްރާގެ އަޅުކަން އަދާކުރުމަށް ސައުދީ އަރަބިއްޔާ އަށް ގޮސްފައިވެ އެވެ.