އިޒްރޭލުން ފަލަސްތީނުގެ ގާޒާގެ އެކި ސަރަހައްދުތަކަށް ދެމުން ގެންދާ ހަމަލާތަކުގައި އިއްޔެ އެކަނިވެސް 112 މީހަކު ޝަހީދުކޮށްލައިފި އެވެ.
ގާޒާގެ ސިއްހީ ހިދުމަތްދޭ ތަންތަނާއި ހަވާލާދީ "އަލްޖަޒީރާ" އިން ބުނީ އިޒްރޭލުން އިއްޔެ ފަތިހުން ފެށިގެން ގާޒާގެ އެކި ސަރަހައްދުތަކަށް ދެމުންދިޔަ ހަމަލާތަކުގައި 112 މީހަކު ޝަހީދުކޮށްލާފައިވާ ކަމަށާއި މީގެތެރޭގައި ގިނަ އަދަދަކަށް ކުޑަކުދިން ހިމެނޭ ކަމަށެވެ.
އިޒްރޭލުން އިއްޔެ ވަނީ ގާޒާގައި ހާލުގައި ޖެހިފައިވާ މީހުން ތިބޭ ތިން ސްކޫލަކަށް ހަމަލާދީ 33 މީހަކު ޝަހީދުކޮށްލާފަ އެވެ. މީގެތެރޭގައި ގިނައީ ކުޑަކުދިންނާއި އަންހެނުންނެވެ.
ގާޒާ އަށް އަލުން ހަމަލާތައް ދޭން އިޒްރޭލުން ފެށީ މިދިޔަ މަހުގެ 18 ވަނަ ދުވަހުން ފެށިގެންނެވެ.
އިޒްރޭލުން އަންނަނީ އާންމުން ދިރިއުޅޭ ތަންތަނުގެ އިތުރުން ގާޒާގެ މިސްކިތްތަކާއި ސިއްހީ ހިދުމަތްދޭ ތަންތަނަށް ވެސް ހަމަލާތައް އަމާޒުކުރަމުންނެވެ.
އިޒްރޭލުން ގާޒާއަށް ހަމަލާދޭން ފުރަތަމަ ފެށީ 2023 ވަނަ އަހަރު އޮކްޓޫބަރު މަހުގެ 7 ވަނަ ދުވަހު ކަމަށްވާއިރު، އެ ހަމަލާތަކުގައި ގާޒާ އިން މިހާތަނަށް 50،000 އަށް ވުރެ ގިނަ މީހުން ވަނީ ޝަހީދުވެފަ އެވެ.
ހަނގުރާމައިގެ ސަބަބުން ގާޒާގެ 85 ޕަސެންޓު މީހުން ގެދޮރު ދޫކޮށް ގޮސްފައިވާއިރު، ގާޒާގެ ބައި މިލިއަނެއްހާ މީހުން ބަޑުހައިހޫނުކަން އަންނަނީ ތަހައްމަލު ކުރަމުންނެވެ.