އިނގިރޭސި ޕްރިމިއާ ލީގުގައި ރޭ ޗެލްސީން 1-0 އިން ޓޮޓެންހަމް ބަލިކޮށްފި އެވެ.
މި މޮޅާއެކު ޗެލްސީ އޮތީ 30 މެޗުން ލިބުނު 52 ޕޮއިންޓާއެކު އެވެ. ޓޮޓެންހަމް އޮތީ 30 މެޗުން ލިބުނު 34 ޕޮއިންޓާ އެކު ލީގުގެ 14 ވަނައިގަ އެވެ. މިއީ ލީގުގައި ޓޮޓެންހަމް ބަލިވި 16 ވަނަ މެޗެވެ.
މި މެޗުގެ ފުރަތަމަ ހާފުގައި ގޯލެއް ފެނިގެން ގޮސްފައި ނުވި ނަމަވެސް ލީޑު ނަގަން ޗެލްސީ އަށް ރަނގަޅު ފުރުސަތުތަކެއް ލިބިފައިވެ އެވެ. އެގޮތުން މެޗުގެ ކުރީކޮޅު ނިކޮލަސް ޖެކްސަން އަށް ހުސް ފުރުސަތެއް ލިބި ބޭކާރުވިއިރު، ޖޭޑަން ސަންޗޯ ފޮނުވާލި ހަމަލާއެއް ޓޮޓެންހަމްގެ ކީޕަރު ވިކާރިއޯ ވަނީ ދިފާއުކޮށްފަ އެވެ.
ޗެލްސީން ލީޑު ނެގީ ދެވަނަ ހާފުގަ ކުރީކޮޅު އެވެ. ކޯލް ޕާމާ ނަގައިދިން ހުރަހަކުން ޓޮޓެންހަމްގެ އޭރިއާ ތެރޭ ހުރެ ބޮލުން ފޮނުވާލި ހަމަލާއަކުން މި ގޯލު ކާމިޔާބުކޮށްދިނީ އެންޒޯ ފެނާންޑޭޒް އެވެ. މެޗުގެ 71 ވަނަ މިނެޓްގައި ޕަޕޭ ސާ ޓޮޓެންހަމަށް ނަތީޖާ އެއްވަރުކޮށްދިން ނަމަވެސް، މި ގޯލު ކާމިޔާބު ކުރުމުގެ ކުރިން ޗެލްސީގެ މިޑްފީލްޑަރު ކައިސޭޑޯ އަށް ސާ ފައުލްކޮށްފައިވާތީ ރެފްރީ ވަނީ ވީއޭއާރް ބެލުމަށްފަހު އެ ގޯލު ކެންސަލްކޮށްފަ އެވެ.
މެޗުގެ ފަހު ވަގުތުކޮޅުތެރޭ ނަތީޖާ އެއްވަރުކޮށްދޭން ޓޮޓެންހަމްގެ ކެޕްޓަން ސޮން އަށް ރަނގަޅު ފުރުސަތެއް ލިބުނު ނަމަވެސް ޗެލްސީގެ އޭރިއާ ތެރޭ ހުރެ އޭނާ ފޮނުވާލި ހަމަލާ މަތަކުރީ ޗެލްސީގެ ކީޕަރު ރޮބަޓް ސަންޗޭޒް އެވެ.
ލީގުގައި ޗެލްސީ ދެން ބައްދަލުކުރާނީ ބްރެންޓްފޯޑްއާ އެވެ. ޓޮޓެންހަމް ނިކުންނާނީ ސައުތެމްޓަންއާ ދެކޮޅަށެވެ.