ހަނގުރާމަވެރި ހަތިޔާރު ގެންގުޅުމުގެ ކުށް ސާބިތުވާކަމަށް ނިންމައި ޖަލަށް ހުކުމްކޮށްފައިވާ ކުރީގެ ޑިފެންސް މިނިސްޓަރު މުހައްމަދު ނާޒިމް ފަރުވާ އަށް ބޭރަށް ފުރުމުގެ ހުއްދަ ކަރެކްޝަނަލް ސާވިސް އިން މިއަދު ދީފި އެވެ.
ރާއްޖެއިން ބޭރަށް ދިއުމުގެ ހުއްދަ ކާނަލް ނާޒިމަށް ދީފައިވާކަން ކަރެކްޝަނަލް ސާވިސްގެ އޮފިޝަލަކު ވަނީ 'އައްޑޫލައިވް' އަށް ކަށަވަރުކޮށްދީފައެވެ.
'އައްޑޫލައިވް' އަށް އެނގިފައިވާ ގޮތުގައި ނާޒިމު ރާއްޖެއިން ބޭރަށް ގެންދިއުމުގެ ހުއްދަ ދިނުމައެކު އިންޑިއާގެ މަދޫރާއީއަށް ނާޒިމު ގެންދިއުމުގެ މަސައްކަތް އާއިލާގެ ފަރާތުން މިހާރުދަނީ ކުރަމުންނެވެ.
ކާނަލް ނާޒިމްގެ ލޮލުގެ ފެނުން ފުސްވާތީ، މީގެ ކުރިން ވެސް ވަނީ ރާއްޖެ އިން ބޭރުން ފަރުވާ ހޯދައިފަ އެވެ. އޭގެފަހުން ވެސް އޭނާގެ ލޮލުގެ ފެނުން އިތުރަށް ގޯސްވާތީ ބޭރުން ފަރުވާ ހޯދަން ޑޮކްޓަރުން ވަނީ ލަފާދީފަ އެވެ.
ނާޒިމްގެ ލޮލުގެ ފެނުން ގޯސްވެފައިވާއިރު، އެކަށީގެންވާ ފަރުވާ ނުދެވިއްޖެ ނަމަ ލޮލުގެ ފެނުން ގޯސްވެދާނެ ކަމަށް ޑޮކްޓަރުން ވަނީ ލަފާދީފައި ވާއިރު އޭނާ އަށް ދިމާވެފައިވާ ހިތުގެ މައްސަލަ އަށް ވެސް އެކަށީގެންވާ ފަރުވާ ނުލިބޭ ކަމަށް އާއިލާ އިން ބުނެ އެވެ.
ބޭސް ފަރުވާ އަށް ނާޒިމް ބޭރަށް ފޮނުވައިދިނުމުގެ އިތުރުން ބަލި ހާލަތު ހުރި ގޮތުން އޭނާ ގެއަށް ބަދަލުކޮށްދޭން ވެސް އާއިލާ އިން ވަނީ ކަރެކްޝަނަލް ސާވިސްގައި އެދިފަ އެވެ.
ކާނަލް ނާޒިމް ޖަލަށް ލާން މިދިޔަ މާޗް މަހު ކްރިމިނަލް ކޯޓުން ކުރި ހުކުމް އޭނާގެ ފަރާތުން ވަނީ އިސްތިއުނާފްކޮށްފައިވާއިރު މިހާތަނަށް ބޭއްވިފައިވަނީ އެ މައްސަލައިގެ 2 އަޑުއެހުމެކެވެ.