Last Updated: April 5, 13:37
Saturday, April 5, 2025
ރިޕޯޓް

ރޯދަ ރަހަ: ސެމޮލީނާ އޮރެންޖް ކޭކް

* ބޭނުންވާ ތަކެތި:

125 ގްރާމް އަން ސޯލްޓެޑް ބަޓަރު
1 މޭޒުމަތީ ސަމުސާ ބޮޑު އޮރެންޖްތޮށި (ގާނާފައި)
1 ޖޯޑު ހަކުރު
2 ބިސް
3/2 ޖޯޑު ސޫޖީ/ސެމޮލީނާ
1 ½ ފުށް (ފުރާނާފައި)
½ ޖޯޑު ކިރު

ލެމަން ސިރަޕަށް ބޭނުންވާ ތަކެތި:

1 ޖޯޑު ހަކުރު
½ ޖޯޑު އޮރެންޖް ހުތް
1 އޮރެންޖް (ތުނިކޮށް ކޮށާފައި)

* ތައްޔާރު ކުރާނެ ގޮތް:

ފުރަތަމަ 160 ޑިގްރީއަށް އަވަން ހޫނުކުރަން ޖައްސާށެވެ. އަދި ހަ ސެންޓިމީޓަރު ފުން ވަށް ޓްރޭއެއްގައި ބަޓަރު ހާކާލާށެވެ. ދެން ބޭކިން ޕޭޕަރު އަޅާށެވެ. ދެން އަވަން ހޫނުކުރުމަށް ބަހައްޓާފައި ބަޓާރާއި ލުނބޯ ތޮށިކޮޅާއި ހަކުރު މިކްސަރަށް އަޅައި ރަނގަޅަށް ހިމުންވެ ކްރީމް ޕޭސްޓުހެން ހުންނާނެހެން މިކްސްކޮށްލާށެވެ. ދެން ބިސް އަޅާށެވެ. އަދި ސެމޮލީނާ ފުށާއި ކިރު އަޅައި ކޭކު މިކްސް ތައްޔާރުކޮށްލާށެވެ.

ދެން ތައްޔާރުކުރި ޓްރޭ ނަގައި މި މިކްސް ޓްރޭއަށް އަޅާށެވެ. އަދި އަވަނަށް ލައި 45-50 މިނެޓު ވަންދެން ފިހެލާނީ އެވެ.

ކޭކު ފިހަން އަވަނަށް ލުމަށް ފަހު ލެމަން ސިރަޕް ތައްޔާރުކުރުމަށް ފަށާށެވެ. ސިރަޕް ތައްޔާރުކުރުމަށް ބައި ޖޯޑު ފެނުގެ ތެރެއަށް ހަކުރާއި އޮރެންޖް ހުތް އަޅައި މަޑު ގިނީގައި ކައްކަން އުނދާށެވެ. އަދި 5 މިނެޓު ވަންދެން ނުވަތަ ހަކުރު ވިރެންދެން މަޑުމަޑުން ދަބައަކުން އެއްކުރަމުން ކައްކާށެވެ.

ދެން އޮރެންޖް ފޮތި އެއަށް އަޅާށެވެ. އަދި ރަހަގަނޑު ފެނުގެ ތެރެއަށް ފެތުރުމަށް ގިނި ބާރުކޮށްލައި 4-5 މިނެޓުވަންދެން ކައްކާށެވެ. ދެން އޮރެންޖް ފޮތިތައް ނަގާށެވެ. އަދި މި ސިރަޕްގެ އެއްބައި ކޭކުގެ މައްޗަށް އަޅާށެވެ. ދެން ކޭކު ސާވްކުރާ ތައްޓަށް ލާށެވެ. އަދި ސާވްކުރާ އިރު އަނެއްކާ ވެސް ސިރަޕް އަޅާށެވެ.

ސާވްކުރާ އިރު ކޭކްގެ މައްޗަށް ބޭނުން ނަމަ ވިޕް ކްރީމް ފަތުރާލައި، މުގުރާފައި ހުރި ޕިސްޓާޗިއޯ އިން ގާނިޝް ވެސް ކޮށްލެވިދާނެ އެވެ.