Last Updated: April 5, 13:37
Saturday, April 5, 2025
ދުނިޔެ

އެމެރިކާ ދެކެ ބިރެއް ނުގަނޭ، ފަލަސްތީނަށްޓަކާ ޖިހާދު ކުރާނަން

އެމެރިކާ ދެކެ ބިރު ނުގަންނަ ކަމަށާއި ފަލަސްތީނު ރައްޔިތުންގެ ހައްގުގައި ޖިހާދު ކުރުމުގައި ދެމި ތިބޭނެ ކަމަށް ޔަމަނުގައި ހަރަކާތްތެރިވާ ހޫޠީންގެ ލީޑަރު އަބްދުލްމާލިކް އަލް ހޫޠީ ވިދާޅުވެއްޖެ އެވެ.

އެމެރިކާ އިން މިދިޔަ މަހުގެ 15 އިން ފެށިގެން އަންނަނީ ހޫތީންނަށް އަމާޒުކޮށް ކަމަށް ބުނެ ޔަމަނުގެ އެކި ސަރަހައްދުތަކަށް ވައިގެ ހަމަލާތައް ދެމުންނެވެ. އެ ހަމަލާތަކުގައި މިހާތަނަށް 61 މީހަކު މަރުވެ 139 މީހަކަށް ވަނީ އެކިވަރުގެ އަނިޔާތައް ލިބިފަ އެވެ.

އިއްޔެ ދެއްވި ހިތާބެއްގައި އަބްދުލްމާލިކް ވިދާޅުވީ އެމެރިކާ އިން ކޮންމެ ދުވަހަކު ވައިގެ އެތައް ހަމަލާއެއް ދިން ނަމަވެސް ހޫތީންގެ އަސްކަރީ ގާބިލުކަން ބަލިކަށިކޮށްލުމުގައި އަދި ރަތްކަނޑުން ދަތުރުކުރާ އިޒްރޭލުގެ ބޯޓުތަކަށް ރައްކާތެރިކަން ދިނުމުގައި ވެސް އެމެރިކާ ފެއިލްވެފައިވާ ކަމަށެވެ. އަދި ހޫތީންގެ ލީޑަރުން ނެތިކޮށްލަން އެމެރިކާ އިން ކަނޑައެޅި އަމާޒަށް ވެސް އެގައުމަށް ވާސިލުވެފައި ނުވާ ކަމަށް އޭނާ ވިދާޅުވި އެވެ.

އެމެރިކާ ދެކެ ބިރު ނުގަންނަކަން ފާހަގަކުރަމުން އަބްދުލްމާލިކު ވަނީ އެގައުމާއި ދެކޮޅަށް ހިންގާ އަސްކަރީ އޮޕަރޭޝަން ކުރިއަށް ގެންދާނެ ކަމުގެ ޔަގީންކަން އަރުވާފަ އެވެ. އަދި ހޫތީންގެ އަމާޒަކީ އެމެރިކާ އާއި އިޒްރޭލު ބައިވެރިވެގެން ފަލަސްތީނުގެ ރައްޔިތުން އެމީހުންގެ ވަޒަނުން ނެރެ މިހާރު ހިންގާ ގަތުލްއާންމު ނިމުމަކަށް ގެންނަން ބާރު އެޅުން ކަމަށާއި އެ ޖިހާދުގައި އެ ޖަމާއަތް ދެމި އޮންނާނެ ކަމަށްވެސް އޭނާ ވިދާޅުވި އެވެ.

މީގެއިތުރުން ހޫތީންގެ ލީޑަރު ވަނީ އެމެރިކާ އާއި އިޒްރޭލު ބައިވެރިވެގެން ޔަމަނަށް ދެމުންދާ ހަމަލާތަކަށް ވާގިވެރިވާ އަރަބި ގައުމުތަކަށް ވެސް އިންޒާރު ދީފަ އެވެ.

އިޒްރޭލުން ގާޒާއަށް ހަމަލާދޭން ފުރަތަމަ ފެށީ 2023 ވަނަ އަހަރު އޮކްޓޫބަރު މަހުގެ 7 ވަނަ ދުވަހު ކަމަށްވާއިރު، ހަމަލާތައް މިދިޔަ ޖެނުއަރީގައި މެދުކަނޑާލި އެވެ. ނަމަވެސް މިދިޔަ މަހުން އިޒްރޭލުން އަނެއްކާވެސް ހަމަލާތައް ދޭން އަލުން ފެށިއިރު، މިހާތަނަށް އެ ހަމަލާތަކުގައި ގާޒާ އިން 50،000 އަށް ވުރެ ގިނަ މީހުން ވަނީ ޝަހީދުވެފަ އެވެ.