ޕްރެޒިޑެންޓްސް ކަޕް 2015ގެ ގްރޫޕް ބީގެ ފުރަތަމަ މެޗް މާޒިޔާ ސްޕޯޓްސް ކްލަބުން ކާމިޔާބުކޮށްފިއެވެ.
އައްޑޫ ފުޓްބޯޅަ ދަނޑުގައި ކުޅުނު މިމެޗް މާޒިޔާ އިން ކާމިޔާބު ކުރީ ކްލަބް ވެލެންސިއާ އާއި ވާދަކޮށް 0-2 އިންނެވެ. މާޒިޔާގެ ފަރާތުން މޮޅު ކުޅުމެއް ފެނިގެން ދިޔަ މިމެޗްގެ ފުރަތަމަ ލަނޑު މާޒިޔާއަށް ކާމިޔާބު ކޮށްދިނީ އަސަދުﷲ އަބްދުﷲއެވެ.
ފުރަތަމަ ހާފް ނިމުމުގެ ކުރިން މާޒިޔާގެ ދެވަނަ ލަނޑު އެޓީމަށް ކާމިޔާބުކޮށްދިނީ އަހުމަދު އިމާޒް (އާއްކޮ) އެވެ. ވެލެންސިޔާގެ ފަރާތުން ދަށް ކުޅުމެއް ފެނިގެން ދިޔަ މި މެޗްގެ ފުރަތަމަ ހާފްގައި އެޓީމަށް މާޒިޔާގެ ގޯލަށް ނުރައްކާތެރި ހަމަލާއެއް ފޮނުވާލެވިފައެއް ނުވެއެވެ.
ސާޅީހަކަށް އަހަަރު ފަހުން މާލެއިން ބޭރުގައި ބާއްވާ ޕްރެޒިޑެންޓްސް ކަޕް ނުވަތަ ގައުމީ ފުޓްބޯޅަ މުބާރާތުގެ ގްރޫޕް ބީ ގެ މެޗުތަކާއި ސެމީ ފައިނަލް އަދި ފައިނަލް ކުޅެން ހަމަޖެހިފައވަނީ އައްޑޫ ފުޓްބޯޅަ ދަނޑުގައެވެ. ގްރޫޕް އޭގެ މެޗްތައް ކުޅެނީ ހދ.ކުޅުދުއްފުށީ ސްޓޭޑިއަމްގައެވެ.
މި މުބާރާތުގެ ގްރޫޕް ބީ ގެ މެޗެއް މާދަމާ ހަވީރު ވެސް އައްޑޫ ފުޓްބޯޅަ ދަނޑުގައި އޮންނާނެއެވެ. އެމެޗްގައި ވާދަ ކުރާނީ ވިކްޓްރީ ސްޕޯޓްސް ކްލަބާއި އީގަލްސް އެވެ.