ރާއްޖެއަށް އެންމެ ރަނގަޅު ގޮތަކީ އެމްޑީޕީ އާއި ޑިމޮކްރެޓްސް ގުޅުން ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
އެކްސްގައި ނަޝީދު ކުރެއްވި ޕޯސްޓެއްގައި ވިދާޅުވީ މި ވަގުތު ރާއްޖެއަށާއި އެމްޑީޕީއަށް އަދި ޑިމޮކްރެޓްސް އަށް ވެސް އެންމެ ރަނގަޅު ގޮތަކީ އެއީ ކަމަށެވެ.
"އަޅުގަނޑަށް ފެންނަ ގޮތުގައި މި ވަގުތު ރާއްޖެއަށާއި އެމްޑީޕީއަށް އަދި ޑިމޮކްރެޓްސް އަށް ވެސް އެންމެ ރަނގަޅު ގޮތަކީ އެމްޑީޕީ އާއި ޑިމޮކްރެޓްސް ގުޅުން." ނަޝީދު ވިދާޅުވި އެވެ.
މިކަމާ ގުޅޭ ގޮތުން އެމްޑީޕީގެ އިސްވެރިން އަދި ވަކި އެއްޗެއް ވިދާޅެއް ނުވެ އެވެ.
ޑިމޮކްރެޓްސް އަކީ އެމްޑީޕީގައި އިސްކޮށް އުޅުއްވުމަށް ފަހު ވަކިވެވަޑައިގެންނެވި ބޭފުޅުންތަކެއް އުފެއްދެވި ޕާޓީއެކެވެ. އެ ޕާޓީ އުފެއްދުމުގައި އެންމެ އިސްކޮށް ހުންނެވީ ވެސް ނަޝީދެވެ.
ނަމަވެސް ދާދި ފަހުން ޑިމޮކްރެޓްސްގައި ތިއްބެވި އިސް ބައެއް ބޭފުޅުން ވަނީ އެ ޕާޓީ ދޫކޮށްލައްވައި އަލުން އެމްޑީޕީއާ ގުޅިވަޑައިގެންފަ އެވެ. އޭގެ ތެރޭގައި އެ ޕާޓީގެ ކުރީގެ ރައީސް ހަސަން ލަތީފާއި ނައިބު ރައީސްގެ މަގާމުގައި ހުންނެވި މުހައްމަދު ޝިފާޒާއި އެސްޓީއޯގެ ކުރީގެ މެނޭޖިން ޑިރެކްޓަރު ހުސެން އަމްރުގެ އިތުރުން ރައްޔިތުންގެ މަޖިލީހުގެ ކުރީގެ މެންބަރު އަލީ އާޒިމް ހިމެނެ އެވެ.
އެ ބޭފުޅުން ޑިމޮކްރެޓްސް ދޫކޮށްލެއްވި ފަހުން އެ ޕާޓީގެ ފަރާތުން އެމްޑީޕީ އަށް ވަރަށް ބޮޑަށް ފާޑު ވިދާޅުވަމުން ގެންދަވަ އެވެ. ޑިމޮކްރެޓްސްގެ މިހާރުގެ ރައީސަކީ ކުރީގެ މަޖިލިސް މެންބަރު އިމްތިޔާޒް ފަހުމީ އެވެ.
އެމްޑީޕީގެ ރައީސަކީ ކުރީގެ ފޮރިން މިނިސްޓަރު އަބްދުﷲ ޝާހިދެވެ. އަދި ޗެއާޕާސަނަކީ ކުރީގެ އިކޮނޮމިކް މިނިސްޓަރު ފައްޔާޒް އިސްމާއީލެވެ.