ރާއްޖެ އަކީ ސައްތައިން ސައްތަ އިސްލާމީ ޤައުމެކެވެ. މި ޤައުމުގެ ކަންކަން ހުންނަންވާނީ އިސްލާމް ދީނާ އެއްގޮތަށެވެ. އެހެން ނަމަވެސް، މި ކުޑަކުޑަ މުޖުތަމަޢުގެ ތެރެއިންވެސް ދީނާދުރު ކަންކަން ފެންނަމުން އެބަދެ އެވެ. އެގޮތުން ފާހަގަކޮށްލެވޭ އެއް ކަމަކީ، ކައިވެނި ކުރުމުގެ ކުރީން ރައްޓެހިވުމާއި، “ލިވް-އިން ރިލޭޝަންޝިޕް”ފަދަ ނަންތަކުގައި ކައިވެންޏަކާ ނުލައި ވެސް އެކުގައި ދިރިއުޅޭ އުޅުމާއި ކައިވެނިކޮށްގެން ތިބެ ވެސް ހިލޭ މީހުންނާ ގުޅުންތައް ބޭއްވުމެވެ.
މާތް ﷲ ކީރިތި ޤުރުއާނުގައި ވާޙިކުރައްވާފައިވެ އެވެ. ﴿وَلَا تَقْرَبُوا الزِّنَىٰ ۖ إِنَّهُ كَانَ فَاحِشَةً وَسَاءَ سَبِيلًا ﴾ (سُورَةُ الإِسرَاء 32) މާނަ: ”އަދި ތިޔަބައިމީހުން ޒިނޭއާ ގާތްނުވާށެވެ! ހަމަކަށަވަރުން އެއީ ހުތުރުކަން ބޮޑުވެގެންވާ ފާފައެއް ކަމުގައިވިއެވެ. އަދި މަގެއްގެ ގޮތުން އެ ކަންތައް ހާދަހާ ނުބައިވެގެންވެއެވެ.”
މި އާޔަތުގެ ޢިބާރާތުގައި ބޮޑު ޙިކުމަތެއްވެއެވެ. އެއިލާހު ވަޙީކުރެއްވީ ޒިނޭ ނުކުރުމަކަށް ނޫނެވެ. ޒިނޭއާ ގާތް ވެސް ނުވުމުމަށެވެ. ޒިނޭއަށް މަގުފަހިވެދާނެ އެންމެހާ ކަންކަމުން ދުރުހެލިވުމަށެވެ. ނަމަވެސް، ހިތާމައަކީ އަޅުގަނޑުމެންގެ މުޖުތަމަޢުގައި ވެސް ބެލެވެރީންގެ ރުހުމާއެކުވެސް މިފަދަ ޢަމަލުތަކަށް މަގުފަހިވާނެ އެތައް ކަމެއް މިހާރު “ހުއްދަ”ކޮށްފައިވާކަމެވެ.
ހަމައެހެންމެ، ސޫރަތުލް މުއުމިނޫންގެ ފަސްވަނަ އާޔަތާއި ހަވަނަ އާޔަތުގެ މާނައިގައިވެ އެވެ. ”އަދި އެ މީހުންނީ، އެ މީހުންގެ ފަރުޖުތަކަށް ރައްކާތެރިވާމީހުންނެވެ. އެ މީހުންގެ އަނބިންގެމައްޗަށާއި، އެ މީހުންނަށް މިލްކުވެގެންވާ އަޅުންގެމައްޗަށް މެނުވީއެވެ. ފަހެ ހަމަކަށަވަރުން އެ މީހުންނީ (އެކަމުގައި) މަލާމާތް ލިބިގެންނުވާ މީހުންނެވެ.”
އަޅުގަނޑުމެން މުސްލިމުން ފަރުޖުތައް ރައްކާތެރިކުރުމަށް ގަދައަޅައި މަސައްކަތް ކުރަން ޖެހެ އެވެ. އެއީ މުއުމިނުންގެ ސިފައެއްކަން ކީރިތި ޤުރުއާނުގައި އެ ވަނީ ބަޔާން ކުރައްވާފަ އެވެ. އަދި ކައިވެނިން ބޭރުން އިސްލާމްދީން ހުއްދަ ނުކުރާ ގޮތަކަށް އެފަދަ ޢަމަލެއް ނުކުރާނޭކަން ވެސް އެވަނީ އަންގަވައިފަ އެވެ.
އާދެ! ޒިނޭއާ ގާތް ނުވާށެވެ. އެފަދަ ކަންކަން ކުރުމަށް މަގުތައް ފަސޭހަވެފައި ވީކަމުގައި ވިޔަސްމެ އެވެ. މުޖުތަމަޢުގައި އެއީ މައްސަލައެއް ނޫން ކަމުގައި ދެކުނަސް ވެސް މެއެވެ.
ނަބިއްޔާ ﷺ ޙަދީޘްކުރައްވާފައިވެއެވެ. (( لا يخلوَنَّ رجلٌ بامرأةٍ إلَّا كانَ ثالثَهما الشَّيطانُ )) (جامع الترمذي) މާނަ: “ހަމަކަށަވަރުން ފިރިހެނަކު އަންހެނަކާ އެކަހެރިނުވާށެވެ. އެދެމީހުންގެ ތިންވަނަ ފަރާތަކީ ޝައިޠާނާއެވެ.” އާދެ! މިފަދަ ޙާލަތެއްގައި ޝައިޠާނާގެ ވަސްވާހުގެ ސަބަބުން ނުބައި ކަންކަމަށް މަގުފަހިވާނެއެވެ.
އެހެން ނަމަވެސް، ސްކޫލު ދައުރުން ފެށިގެން ދަރިވަރުން އެކި ކުދިންނާ ރައްޓެހިވުމާއި މިފަދަ ކަންކަމަށް ޢާއިލާގެ ތެރޭގައި ވެސް ހިތްވަރު ދިނުމާއި، އަދި މި ނޫނަސް ކައިވެނި ނުކޮށް އެކުގައި އެއް ތަނެއްގައި ދިރިއުޅޭ އުޅުމަކީ އިސްލާމް ދީނާ މުޅީން ޚިލާފު ކަންކަމެވެ. މިފަދަ ޢަމަލުތައް ހުއްޓުވަން އަޅުގަނޑުމެން އެންމެން މަސައްކަތް ކުރަން ޖެހެއެވެ. އިސްލާމް ދީނުގައި ޢާއިލީ ގުޅުން ދަމަހައްޓައި ދަރީން ބޮޑުކުރުމަށް ދަސްކޮށް ދެއްވާފައިވާ އެންމެހާ އުސޫލުތަކާ ޚިލާފު ޢަމަލުތަކުގެ ސަބަބުން ދިރިއުޅުމުގައި ބަރަކާތް ކެނޑި އެތައް ބަޔަކު ޙާލުގައި ޖެހޭތަން ފެނެއެވެ. އަންހެނުންނާ ޅަ ދަރީން ބިކަވާތަން އެބަ ފެނެ އެވެ.
ނަބިއްޔާ ﷺ ޙަދީޘްކުރައްވާފައިވެއެވެ. ((النِّكَاحُ مِنْ سُنَّتِي فَمَنْ لَمْ يَعْمَلْ بِسُنَّتِي فَلَيْسَ مِنِّي…)) (سنن ابن ماجه) މާނަ: “ކައިވެންޏަކީ ތިމަންކަލޭގެފާނުގެ ސުންނަތުގެ ތެރެއިންވާކަމެކެވެ. ތިމަންކަލޭގެފާނުގެ ސުންނަތަށް ޢަމަލު ނުކުރާ މީހާވަނީ ތިމަންކަލޭގެފާނާ އެކު އެއް ނޫނެނެވެ.”
ދުޢާ އަކީ ލޮބުވެތި ނަބިއްޔާ ﷺ ދަސްކޮށްދެއްވި ގޮތަށް އަޅުގަނޑުމެންގެ ދިރިއުޅުން ބައްޓަންކުރަން މަސައްކަތްކުރާ ބަޔަކު ކަމުގައި މި ދިވެހި މުޖުތަމަޢު ލެއްވުމެވެ.
މަސްދަރު: އިލްމު.އެމްވީ