ރާއްޖޭގެ މަޝްހޫރު ޑައިރެކްޓަރު ފާތުމަތު ނަހުލާގެ އާ ފިލްމު "ސޮރީ" ގެ ރަސްމީ ޕޯސްޓަރާއި ފިލްމުގެ ލަވަތަކެއް އާންމުކުރަން މި މަހުގެ 8 ވަނަ ދުވަހުގެ ރޭ ހާއްސަ އިވެންޓެއް ބާއްވަން ތައްޔާރުވެއްޖެ އެވެ.
އާންމުކޮށް ހުޅުވާލައިގެން ބާއްވާ މި އިވެންޓް އޮންނާނީ ސޯޝަލް ސެންޓަރުގެ އައުޓްޑޯ ސްޓޭޖްގަ އެވެ. އިވެންޓް ފަށާނީ 8:45 ގަ އެވެ.
ނަހުލާ ލިޔެ، ޑައިރެކްޓްކޮށް އަދި ޕްރޮޑިއުސްކޮށް ގެނެސްދޭ "ސޮރީ" އަކީ އޭނަގެ ސިގްނޭޗާ ސްޓައިލް ކަމަށްވާ ރުއިން ގިނަ އަސަރު ގަދަ ލޯބީގެ ފިލްމެކެވެ. ނަހުލާގެ އާއިލާގެ ދެ ކުޑަކުއްޖަކު ވެސް މުހިއްމު ރޯލުތައް ކުޅެފައިވާ ފިލްމުގެ ކާސްޓްގައި މަޝްހޫރު ތަރިންތަކެއް ވެސް ހިމެނެ އެވެ.
އޭގެ ތެރޭގައި ޔޫސުފް ޝަފީއު (ޔޫއްޕެ)، މަރިޔަމް އައްޒަ، ކުރީގެ އެކްޓަރު ހުސައިން ސޮބާހް ޝީލާ ނަޖީބު އަދި މަރިޔަމް ނިޝާ ހިމެނެ އެވެ. އަދި "ސޮރީ" ގެ ރޯލުތަކުން ވާޝިޔާ މުހައްމަދާއި އަހުމަދު ޝާރިފް ވެސް ފެންނާނެ އެވެ. މި ފިލްމުގައި ރޯލުތަކެއް ކުޅެފައިވާ ދެ ކުދިންގެ ތެރެއިން އެކަކީ ނަހުލާގެ ހަގު ދަރިފުޅު ލާލި އެވެ. އަނެއް ކުއްޖާ އަކީ އޭނަގެ މާމަ ދަރިއެއް ކަމަށްވާ އެވްލީ އެވެ.
އެވްލީ އަކީ ނަހުލާގެ ކުރީގެ ފިލްމުތައް ކަމަށްވާ "ނާއުންމީދު" އާއި "ޒުލޭހާ" ގައި ޗައިލްޑް އާޓިސްޓެއްގެ ރޯލު ކުޅުނު ނަހުލާގެ ދޮށީ އަންހެން ދަރިފުޅު ނާޝް ސިނާންގެ ދަރިއެކެވެ.
މި އަހަރުގެ އެންމެ އުންމީދީ ފިލްމުތަކުގެ ތެރޭގައި "ސޮރީ" ސިނަމާ އަށް ގެންނަން ނިންމާފައި އޮތީ ޖޫން 17 ގަ އެވެ.
ނަހުލާ އަކީ ބެލުންތެރިންގެ ވަރަށް ބޮޑު މަގުބޫލު ކަމެއް ހޯދި ފިލްމުތަކެއް ގެނެސްދީފައިވާ އަދި ރާއްޖޭގައި ފިލްމު ބަލާ އޯޑިއަންސްގެ ވަރަށް ބޮޑު ލޯތްބެއް ހޯދާފައިވާ ޑައިރެކްޓަރެވެ. އޭނަ ޑައިރެކްޓްކޮށް ގެނެސްދިން ފިލްމުތަކުގެ ތެރޭގައި "ކަލާޔާނުލާ"، "ނާއުންމީދު"، "ޒުލޭހާ" އަދި "ޔޫސުފް" ހިމެނެ އެވެ.
ނަހުލާގެ އެންމެ ފަހުގެ ފިލްމަކީ އަހުމަދު ޝިނާންއާ ގުޅިގެން 2016 ގައި ގެނެސްދިން ބިރުވެރި ފިލްމު "4426" އެވެ.