އެމްޑީޕީ އާއި ޑިމޮކްރެޓްސް ގުޅިގެން މަސައްކަތް ކުރުމަށް، ކުރީގެ ރައީސް މުހައްމަދު ނަޝީދު ހުށަހެޅުއްވި ހިޔާލަށް ޑިމޮކްރެޓްސްގެ ރައީސް އިމްތިޔާޒު ފަހުމީ (އިންތި) މަރުހަބާ ވިދާޅުވެއްޖެ އެވެ.
އެކްސްގައި އިއްޔެ ނަޝީދު ކުރެއްވި ޕޯސްޓެއްގައި ވިދާޅުވީ މި ވަގުތު ރާއްޖެއަށާއި އެމްޑީޕީއަށް އަދި ޑިމޮކްރެޓްސް އަށް ވެސް އެންމެ ރަނގަޅު ގޮތަކީ އެއީ ކަމަށެވެ.
"އަޅުގަނޑަށް ފެންނަ ގޮތުގައި މި ވަގުތު ރާއްޖެއަށާއި އެމްޑީޕީއަށް އަދި ޑިމޮކްރެޓްސް އަށް ވެސް އެންމެ ރަނގަޅު ގޮތަކީ އެމްޑީޕީ އާއި ޑިމޮކްރެޓްސް ގުޅުން." ނަޝީދު ވިދާޅުވި އެވެ.
ނަޝީދުގެ އެ ޕޯސްޓާއި ގުޅިގެން އިންތި ވަނީ ނަޝީދުގެ ވިސްނުންފުޅަށް މަރުހަބާ ދަންނަވައި ޕޯސްޓެއް ކުރައްވާފަ އެވެ. ނަޝީދުގެ ހިޔާލަށް އެމްޑީޕީގެ ޗެއާޕާސަން ފައްޔާޒު އިސްމާއީލް ވެސް ވަނީ މަރުހަބާ ވިދާޅުވެފަ އެވެ.
ރައީސް މުޙައްމަދު ނަޝީދުގެ މި ވިސްނުންފުޅަށް މަރުޙަބާ ދަންނަވަން. https://t.co/TCNW944KAb
— 𝐈𝐦𝐭𝐡𝐢𝐲𝐚𝐳 𝐅𝐚𝐡𝐦𝐲 (@Imthiyazfahmy) April 5, 2025
ޑިމޮކްރެޓްސް އަކީ އެމްޑީޕީގައި އިސްކޮށް އުޅުއްވުމަށް ފަހު ވަކިވެވަޑައިގެންނެވި ބޭފުޅުންތަކެއް އުފެއްދެވި ޕާޓީއެކެވެ. އެ ޕާޓީ އުފެއްދުމުގައި އެންމެ އިސްކޮށް ހުންނެވީ ވެސް ނަޝީދެވެ.
ނަމަވެސް ދާދި ފަހުން ޑިމޮކްރެޓްސްގައި ތިއްބެވި އިސް ބައެއް ބޭފުޅުން ވަނީ އެ ޕާޓީ ދޫކޮށްލައްވައި އަލުން އެމްޑީޕީއާ ގުޅިވަޑައިގެންފަ އެވެ. އޭގެ ތެރޭގައި އެ ޕާޓީގެ ކުރީގެ ރައީސް ހަސަން ލަތީފާއި ނައިބު ރައީސްގެ މަގާމުގައި ހުންނެވި މުހައްމަދު ޝިފާޒާއި އެސްޓީއޯގެ ކުރީގެ މެނޭޖިން ޑިރެކްޓަރު ހުސެން އަމްރުގެ އިތުރުން ރައްޔިތުންގެ މަޖިލީހުގެ ކުރީގެ މެންބަރު އަލީ އާޒިމް ހިމެނެ އެވެ.