ޕްރެޒިޑެންޓްސް ކަޕްގެ ގްރޫޕް ބީގައި ވިކްޓްރީ އާއި އީގަލްސް ބައްދަލުކުރި މެޗް އެއްވެސް ޓީމަކަށް ލަނޑެއް ނުޖެހި އެއްވަރުވެއްޖެއެވެ.
މިމުބާރާތުގެ އެންމެ ކާމިޔާބު ޓީމް ކަމުގައިވާ ވިކްޓްރީ އާއި ފާއިތުވި އަހަރުގެ ރަނަރަޕް އީގަލްސްގެ ފަރާތުން ވެސް ހަމަހަމަ ކުޅުމެއް ފެނިގެން ގޮސްފައިވާއިރު ލަނޑު ޖަހާނެ ފުރުސަތުތައް ދެ ޓީމަށް ވެސް ލިބިފައިވެއެވެ.
އެގޮތުން މެޗްގެ ފުރަތަމަ ހާފުގައި ވިކްޓްރީގެ ތަސްމީނު އަށް ލިބުނު ފުރުސަތު ފާހަގަކޮށްލެވެއެވެ. ނަމަވެސް އީގަލްސްގެ ޕެނަލްޓީއޭރިއާ ތެރޭ ހުހަށް އޮވެ ތަސްނީމް ކުރިއަށް ފޮނުވާލި ބޯޅަ އީގަލްސްގެ ކީޕަރު ވަނީ ހުށިޔާރު ކަމާއި އެކު ދިފާއުކޮށްފައެވެ.
މެޗްގައި ލަނޑު ޖަހާނެ ރަނގަޅު ފުރުސަތުތަކެއް އީގަލްސް އަށް ވެސް ވަނީ ލިބިފައެވެ. އެގޮތުން އެޓީމުގެ މުބީން އަށާއި އީސަ އަށް ވެސް ރަގަޅު ފުރުސަތު ތަކެއް ލިބުނު ނަމަވެސް އެއިން އެއްވެސް ފުރުސަތެއްގެ ބޭނުން ހިފިފައެއް ނުވެއެވެ.
މެޗަށް ފަހު ވާހަކަ ދައްކަމުން އީގަލްސްގެ ކޯޗް އިހްސާން އަބްދުލްޣަނީ ބުނިގޮތުގައި މި ނަތީޖާ އަކީ އެ ޓީމަށް އެހާ ގޯސް ނަތީޖާއެއް ނޫން ކަމަށާއި މުބާރާތުގައި ކުރިއަށް ދިއުމަށް އަދި ފުރުސަތު އެބައޮތް ކަމަށެވެ.
މުބާރާތުގެ މެޗެއް ދެން އޮންނާނީ މިމަހުގެ 18 ވަނަ ދުވަހުއެވެ. އެމެޗްގައި ބައްދަލު ކުރާނީ ކްލަބް ވެލެންސިއާ އާއި އީގަލްސް އެވެ.