މިރޭ އައްޑޫ ސިޓީ މަރަދޫގައި ދެ ސައިކަލެއް ޖެހި ހިނގި އެކްސިޑެންޓެއްގައި ޒަޚަމްވި 2 މީހަކު ހިތަދޫ ރީޖަނަލް ހޮސްޕިޓަލަށް ގެނައިތާ ގިނަ އިރުތަކެއް ވީއިރު ވެސް ފަރުވާދޭނެ ޑޮކްޓަރަކު ނެތުމުން އާއިލާގެ މީހުން ހޮސްޕިޓަލް ދޮށަށް އެއްވެ ނުރުހުން ފާޅުކޮށްފިއެވެ.
ހިތަދޫ ހޮސްޕިޓަލުގައި މިވަގުތު ހުރި 'އައްޑޫލައިވް'ގެ ނޫސްވެރިޔާ ބުނި ގޮތުގައި އެކްސިޑެންޓްގައި ޒަޚަމްވި ދެ މީހުން ހޮސްޕިޓަލަށް ގެނެސްފައި ވަނީ މިރޭ 08:10 އެހާކަށް ހާއިރު ކަމަށެވެ. އަދި ޑޮކްޓަރު އައިސް އެމީހުންނަށް ފަރުވާދޭން ފަށާފައި ވަނީ 10 ޖެހި ފަހުން ކަމަށެވެ.
މައުލޫމާތު ލިބިފައިވާ ގޮތުގައި ޑޮކްޓަރު ހޮސްޕިޓަލަށް އައިސް ވަގުތުން ވަނީ ފުލުހުންނަށް ގުޅައި ޒަޚަމްވި މީހުންގެ ފަރާތުން އޭނާއަށް ބިރުދައްކާ ކަމަށް މައްސަލަ ހުށަހަޅާފައެވެ. ފުލުހުން ވަނީ އެސަރަހައްދަށް އައިސް ހޮސްޕިޓަލުގައި ނުރުހުން ފާޅުކުރަމުން ދިޔަ އާއިލާގެ މީހުންނާއި ވާހަކަ ދެއްކުމަށް ފަހު އެގޮތަށް އަމަލު ނުކުރުމަށް ނަސޭހަތްތެރިވެފައެވެ.
ނަމަވެސް 'އައްޑޫލައިވް' އާއި ވާހަކަ ދެއްކި މީހަކު ބުނި ގޮތުގައި އެމީހުން ޑޮކްޓަރަށް ބިރު ދައްކާފައި ނުވާނެ ކަމަށާއި، މައްސަލަ ޖެއްސީ ފަރުވާ ނުދީ ގިނަ އިރުތަކެއް ވާތީ އެކަމާއި ކަމަށެވެ.
"އަޅުގަނޑުމެން މައްސަލަ ޖެއްސީ ފަރުވާ ނުދެވި ލަސްވާތީ. ޑޮކްޓަރު ބުނަނީ ތިމަންނަގެ ޑިއުޓީއެއް ނޫނޭ. ކޮންމެވެސް އެހެން މީހެއްގެ ޑިއުޓީއެކޭ " އޭނަ ބުންޏެވެ.
މިރޭ މަރަދޫގައި ހިނގި އެކްސިޑެންޓްގައި ދެ މީހަކަށް އަނިޔާވެފައިވާއިރު އެމީހުންގެ ގައިގެ އެތަން މިތަނުން މަށައިގެން ގޮސްފައިވާއިރު ކޮންމެވެސް ވަރަކަށް ކައްޓަށް އަނިޔާވެފައިވާ ކަމަށް އާއިލާއިން މައުލޫމާތު ދެއެވެ. ނަމަވެސް އެމީހުންނަށް ލިބުނު އަނިޔާތަކުގެ ތަފްސީލެއް އަދި ހިތަދޫ ހޮސްޕިޓަލުން ވަނީ ސާފުވާގޮތް ނުވެފައެވެ.