މިނިވަން50 ޗެމްޕިއަންޝިޕުގައި މިއަދު ހަވީރު، ފޭދޫ ފުޓްބޯޅަ ޓީމާއި އެއްކޮށް ކުޅެން ހަމަޖެހިފައިވާ މެޗަށް މުޅި ޓީމު އޮތީ ވަރަށް ބޮޑަށް ތައްޔާރުވެފައި ކަމަށް މަރަދޫ ފޭދޫ ޓީމުން ބުނެފިއެވެ.
މަަރަދޫފޭދޫ ޓީމުގެ ކޯޗް އިމްރާން އަލީ، 'އައްޑޫލައިވް' އަށް މައުލޫމާތު ދެމުން ބުނިގޮތުގައި ޓީމުގެ ހުރިހާ ކުޅުންތެރިން ވެސް ތިބީ ކޮންފިޑެންސާއި އެއްކޮށް ކަމަށާއި މިއަދުގެ މެޗަށް ޓީމު ވަރަށް ރަނގަޅަށް ތައްޔާރުވެފައިވާ ކަމަށެވެ.
" ޓީމުގައި އަނިޔާގެ އެއްވެސް މައްސަލައެއް ނެތް. އަޅުގަނޑުމެން ޓީމު އޮތީ ހަމަ ކޮންފިޑެންސާއި އެއްކޮށް މެޗަށް ވަރަށް ރަނގަޅަށް ތައްޔާރުވެފައި. އިރާދަކުރެއްވިއްޔާ މޮޅުވެގެން ފައިބާނީ"، އިމްރާން ބުންޏެވެ.
މަރަދޫފޭދޫ ޓީމުގައި ހިމެނެނީ މުޅިން ވެސް މަރަދޫ، މަރަދޫފޭދޫ އަދި ފޭދޫގެ ކުޅުންތެރިންނެވެ. އިމްރާން ބުނިގޮތުގައި އަތޮޅުން ބޭރުގެ ކުޅުންތެރިންނާއި ބިދޭސީ ކުޅުންތެރިން ނެތުމަކީ ޑިސްއެޑްވާންޓޭޖެއް ކަމުގައި ޤަބޫލުނުކުރާ ކަމަށެވެ.
އައްޑޫގައި ބޭއްވި ފުޓްބޯޅަ މުބާރާތްތަކުގައި ވިދާލާފައިވާ ބައެއް ކުޅުންތެރިންނާއި ތަޖުރިބާކާރު ކުޅުންތެރިން ތަކެއް މައްޗަށް އެކުލެވޭ މަރަދޫފޭދޫ ޓީމުގެ ކޯޗް އިމްރާން އަކީ މުބާރާތުގައި ފެނިގެންދާނެ އެންމެ ޒުވާން ކޯޗެވެ.
މަރަދޫފޭދޫ ޓީމާއި ފޭދޫ ފުޓްބޯޅަ ޓީމް ބައްދަލު ކުރާ މެޗް އޮންނާނީ މިއަދު ހަވީރު 4 ޖަހާއިރު ފޭދޫ ފުޓްބޯޅަ ދަނޑުގައެވެ.