އައްޑޫ ސިޓީ، ރުއްޖެހެރަ ސަރަހައްދުގެ ގޮނޑުދޮށުން ވެލިނަގަމުންދިޔަ ބަޔަކު ފުލުހުންގެ ބެލުމުގެ ދަށަށް ގެނެސްފި އެވެ.
މައުލޫމާތު ލިބިފައިވާ ގޮތުގައި މި މައްސަލަ އާއި ގުޅިގެން ފުލުހުންގެ ބެލުމުގެ ދަށަށް ގެނެސްފައިވަނީ ދިވެހި 5 ފިރިހެނުންނެވެ.
ފުލުހުންގެ ވެބްސައިޓްގައި ބުނެފައިވާ ގޮތުގައި، އެމީހުން ފުލުހުންގެ ބެލުމުގެ ދަށަށް ގެނެސްފައިވަނީ، ބަޔަކު ޤަވާޢިދާ ޚިލާފަށް ވެލިނަގަމުންދާކަމަށް ފުލުހުންނަށް ލިބުނު މަޢުލޫމާތަކާ ގުޅިގެން މިއަދު މެދުރުގެ ވަގުތެއްގައި، ހިތަދޫ، ކުނިކޮއްޓާއި ދިމާލަށް ގޮނޑުދޮށުން ވެއްޔާއި އަކިރި ނަގަމުންދަނިކޮށް ކުށުގެ ވެށިންނެވެ.
ފުލުހުންގެ ބެލުމުގެ ދަށަށް އެމީހުން ގެނައި ސަރަހައްދުން ނަގާފައި ހުރި 21 ބަސްތާ އަކިރިއާއި 38 ބަސްތާ ދޮންވެލި ފުލުހުން ވަނީ އެ ތަކެތި ސަރަހައްދަށް ހުސްކޮށްފައެވެ.
ރަށްރަށުގެ ގޮނޑުދޮށް ތަކުން ވެލިނެގުމަކީ ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ޤާނޫނޫ، ޤާނޫނު ނަމްބަރު 4/93 ގެ ދަށުން މަނާކަމެކެވެ.