ދިވެހިރާއްޖޭގެ އެތެރޭގެ އުދުހުންތަކުގެ ޓިކެޓް އަގު ހެޔޮ ކޮށްދެއްވާނެ ކަމަށް ނައިބް ރައީސް އަހްމަދް އަދީބް ވިދާޅުވެއްޖެއެވެ.
އަދީބް މިގޮތަށް ވިދާޅުވެފައި ވަނީ މާފަރު އެއަރޕޯޓުގެ ބިންގާ އެޅުމުގެ ރަސްމިއްޔާތު ޝަރަފްވެރިކޮށްދެއްވާ ވާހަކަފުޅު ދައްކަވަމުންނެވެ. އެ ރަސްމިއްޔާތުގައި ވާހަކަ ދައްކަމުން އަދީބު ވިދާޅުވި ގޮތުގައި، 2018 ވަނަ އަހަރުގެ އިންތިހާބު ކާމިޔާބު ކުރާނީ އެއާޕޯޓުތަކާއި ގައުމަށް ބޭނުންވާ އިންފްރާސްޓްރަކްޗާ ބިނާކޮށްގެން ކަމަށާއި އަދި ވައިގެ ދަތުރުރައް އިތުރުކޮށްގެން މި ފަސް އަހަރުތެރޭގައި ދިވެހިންނަށް އަގު ހެޔޮކޮށް ޑޮމެސްޓިކް ޓިކެޓް ވިއްކާނެ ކަމަށެވެ.
ދަތުރުފަތުރު ކުރުމަށް އޮތް ގޮންޖެހުން ނައްތާލެވޭނީ އެއާޕޯޓްތަކެއް މެދުވެރިކޮށް ރާއްޖެ ގުޅާލެވިގެން ކަމަށާއި ސަރުކާރުގެ އަމާޒަކީ އެއާޕޯޓްތައް މެދުވެރިކޮށް ވައިގެ މަގުން ރާއްޖެ ގުޅާލައިގެން އިގްތިސާދީ ގޮތުން ފައިދާތަކެއް ހޯދުން ކަމަށް ވެސް ނައިބް ރައީސް ވިދާޅުވިއެވެ.
އެމަނިކުފާނު އިތުރަށް ވިދާޅުވީ ސަރުކާރުގެ އަމާޒަކީ ރާއްޖެ ވައިގެ މަގުން ގުޅުވާލުން ކަމަށާއި އެގޮތުން މާފަރުގައި އަޅާ އެއަރޕޯޓުވެސް ވަރަށް އަވަހަށް ނިމިގެންދާނެ ކަމަށެވެ.