އިސްމެހެލާ ހެރަ ރިސޯޓަކަށް ހެދުމުގެ ޕްރޮޖެކްޓްގެ އެއްވެސް މަސައްކަތެއް މިހާތަނަށް ޓޫރިޒަމް މިނިސްޓްރީގެ ފަރާތުން ކޮށްފައި ނުވާކަން އިތުބާރު ހުރިގޮތެއްގައި 'އައްޑޫލައިވް' އަށް އެނގިއްޖެއެވެ.
ޓޫރިޒަމް މިނިސްޓްރީގެ އިސް އޮފިޝަލަކު 'އައްޑޫލައިވް' އަށް މައުލޫމާތު ދެމުން ބުނިގޮތުގައި އިސްމެހެލާ ހެރަ ޕްރޮޖެކްޓާއި ގުޅުން ހުރި އެއްވެސް މަސައްކަތެއް މިހާތަނަށް އެ މިނިސްޓްރީގެ ފަރާތުން ކޮށްފައި ނުވާނެ ކަމަށާއި، އެ ވާހަކަ ދެކެވުނީ ހަމައެކަނި ޕްރޮޖެކްޓު އިފްތިތާޙް ކުރުމުގެ ކުރިން ކަމަށެވެ.
" އިސްމެހެލާ ޕްރޮޖެކްޓެއްގެ މަސައްކަތެއް މިނިސްޓްރީއަކުން ނުކުރޭ. އަދި އެއްވެސް ފަރާތަކުން ޝައުގުވެރިކަން ފާޅުކޮށްފަ އެއް ނެތް" ނަން ހާމަނުކުރުމަށް ޝަރުތުކޮށް 'އައްޑޫލައިވް' އާއި ވާހަކަ ދެއްކި އޮފިޝަލް ބުންޏެވެ.
ފާއިތުވި އެޕްރީލް މަހު ސަރުކާރުން އިސްމެހެލާ ޕްރޮޖެކްޓް އިފްތިތާޙްކޮށްފައިވާއިރު އެ ޕްރޮޖެކްޓްގެ ދަށުން 600 އެނދު ހިމެނޭ ރިސޯޓެއް ތަރައްޤީކުރެވިގެންދާއިރު، އެތަނުން 1800 ވަޒީފާ އުފެދިގެން ދާނެ ކަމަށް ސަރުކާރުން ވަނީ ބުނެފައެވެ. އެހެން ނަމަވެސް އޭގެ ފަހުން އެ ޕްރޮޖެކްޓާއި ބެހޭގޮތުން އެއްވެސް ވާހަކައެއް ސަރުކާރުން ދައްކާފައެއް ނުވެއެވެ.
އިސްމެލާ ހެރަ ޕްރޮޖެކްޓާއި ބެހޭގޮތުން ދާދިފަހުން 'އައްޑޫލައިވް' އަށް ދިން އިންޓަވިއު އެއްގައި ހުޅުމީދޫ ދާއިރާގެ ކައުންސިލަރ، އަލީ މުހައްމަދު ވިދާޅުވެފައިވާ ގޮތުގައި، އެ ޕްރޮޖެކްޓް ހުއްޓުމެއް ނެތި ކުރިއަށްދާ ކަމުގެ ޔަޤީންކަން އެބައޮތް ކަމަށާއި ތަފްސީލް އެނގިވަޑައިގަންނަވާނީ ޓޫރިޒަމް މިނިސްޓްރީގެ ބޭފުޅުންނަށް ކަމަށެވެ.