އައްޑޫ ސިޓީ، ފޭދޫ ބަނދަރާއި ދިމާލުން ލިންކް ރޯޑްގައި ނުރައްކާތެރި އެކްސިޑެންޓެއް ހިނގައިފިއެވެ.
މި އެކްސިޑެންޓް ހިނގާފައިވަނީ ލިންކް ރޯޑުން ދުއްވާފައި ދިޔަ ސައިކަލަކާއި ވޭނެއް ޖެހިގެންނެވެ. އެކްސިޑެންޓްގައި ސައިކަލް ދުއްވަން އިން ޒުވާނާއަށް މާބޮޑު އަނިޔާއެއް ނުވާކަމަށް ވެއެވެ.
މަންޒަރު ދުށް މީހަކު 'އައްޑޫލައިވް' އަށް މައުލޫމާތު ދެމުން ބުނިގޮތުގައި އެކްސިޑެންޓް ހިނގާފައި ވަނީ ލިންކް ރޯޑް ހުރަސްކޮށް ބަނދަރާއި ދިމާލަށް ދިޔަ ވޭނަކާއިގަމާއި ވީ ފަޅިން އައި ސައިކަލެއްގައި ޖެހިގެން ކަމަށެވެ.
" ބަލަންވާ ވަރަށް ނުބަލައި މަގު ހުރަސްކޮށްލީމަ އެކްސިޑެންޓް ހިނގީ. ނަސީބަކުން ސައިކަލް ދުއްވަން އިން ޒުވާނާއަށް މާބޮޑު އަނިޔާއެއް ނުވޭ"
އެކްސިޑެންޓްގައި ސައިކަލަށް ވަރަށް ބޮޑަށް ގެއްލުން ވެފައިވާއިރު، ވޭނުގެ ކުރީކޮޅަށް ވެސް ކޮންމެވެސް ވަރަކަށް ވަނީ ގެއްލުން ވެފައެވެ. އެކްސިޑެންޓްވި ވޭނަކީ ފޭދޫ ތްރީއެސް މާޓުގެ ވޭނެކެވެ.
މިއަދު ހަވީރު ފޭދޫގައި ހިނގި އެކްސިޑެންޓްގެ މައްސަލަ ގަން ޕޮލިސް ސްޓޭޝަނުން ގެންދަނީ ތަހުޤީގް ކުރަމުންނެވެ.