ހޯމަ ދުވަހުގެ ރޭ ހިފާ ރަތް ހަނދުކޭތަ އާ ގުޅިގެން ދިޔަވަރަށާއި، އޮއިވަރަށް އަންނަ ބަދަލުތަކާއި ގުޅިގެން އައްޑޫ ސިޓީގެ ހަތަރު ރަށަކަށް ވެސް އުދަ އަރާފާނެ ކަމަށް ލަފާކުރެވޭ ކަމަށް މޫސުމާ ބެހޭ އިދާރާ، މެޓް އޮފީހުން ބުނެފިއެވެ.
މިއަދުން ފެށިގެން ސެޕްޓެމްބަރ މަހުގެ 30 ވަނަ ދުވަހުގެ ނިޔަލަށް އުދައިގެ އަސަރުކޮށް ފާނެ ކަމަށް ބެލެވޭ އައްޑޫގެ ހަތަރު ރަށަކީ، ފޭދު އާއި މަރަދޫފޭދު އާއި މަރަދޫގެ އިތުރުން ހުޅުދު އެވެ.
މެޓް އޮފީހުގެ އޮފިޝަލަކު 'އައްޑޫލައިވް' އަށް މައުލޫމާތު ދެމުން ވިދާޅުވި ގޮތުގައި ހަނދުކޭތަ އާ ގުޅިގެން ކަނޑުގެ އޮއިވަރަށާއި ދިޔަވަރަށް އެންމެ ބޮޑަށް ބަދަލު އަންނާނެކަމަށް ލަފާ ކުރެވެނީ މިއަދުން ފެށިގެން މިމަހުގެ 30 ވަނަ ދުވަހުގެ ނިޔަލަށް ކަމަށެވެ.
އޮފިޝަލް ވިދާޅުވި ގޮތުގައިި މި ދުވަސްތަކުގައި ކަނޑުގެ ދެ ބާނި ދޭތެރޭގައި 10 ސިކުންތުގެ ދުރުމިން ހުންނާނެ ކަމަށް ލަފާކުރެވޭ ކަމަށެވެ. އަދި ރާޅު އެންމެ ބޮޑުވާނެ ވަގުތުގައި މި ދުރުމިން ހުންނާނީ 11 ސިކުންތާއި 13 ސިކުންތާއި ދެމެދުގައި ކަމަށާއި، އެ ދުވަސްތަކުގައި ރާއްޖޭގެ ރަށްރަށަށް އުދަ އަރާނަމަ، ރާޅުގެ އުސްމިނުގައި ހުންނާނެ ކަމަށް ލަފާކުރެވެނީ 3 ފޫޓާއި 6 ފޫޓާއި ދެމެދުގެ އުސްމިނެއް ކަމަށް ލަފާކުރެވޭ ކަމަށެވެ.
މޫސުމާއި ބެހޭ ޤައުމީ އިދާރާއިން ވަނީ އައްޑޫގެ ހަތަރު ރަށަކާއި އެކު އުދަ އަރާފާނެ ކަމަށް ލަފާކުރެވޭ 44 ރަށެއްގެ ނަންތައް އާންމުކޮށް އިއުލާންކޮށްފައެވެ.