ދިވެހިރާއްޖޭގެ މިނިވަން ކަމަށް 50 އަހަރު ފުރުމާއި ގުޅިގެން ކުރައަށް ގެންދާ “މިނިވަން 50″ ގެ ހަރަކާތްތަކާ ގުޅުވައިގެން ރާއްޖޭގެ އެކި ސަރަހައްދުތަކުގައި ބާއްވަމުން އަންނަ “ފުނަ” ޝޯވ އަށް ތައްޔާރުވުމުގެ މަސައްކަތް ފޯރިއާއި އެކު ފޭދޫގެ ޒުވާނުން ކުރަމުން އެބަގެންދެއެވެ.
ސަގާފީ އެކިއެކި ހަރަކާތްތައް ދައްކައިލުމަށް ބާއްވަމުން އަންނަ “ފުނަ” ޝޯވ، އައްޑޫ ސިޓީގައި ބާއްވަން ހަމަޖެހިފައިވަނީ ފޭދޫގައެވެ. އެރަށުގައި މި ޝޯވ ބާއްވާ ސަރަހައްދު ތައްޔާރު ކުރުމުގެ މަސައްކަތް ކުރަމުން އަންނަނީ ފޭދޫ ޔޫތު ކޮމިއުނިޓީ (އެފްވައިސީ) ގެ ފަރާތުންނެވެ.
އެފްވައިސީގެ ފަރާތުން ފޭދޫ ލިންކް ރޯޑްގައި ހުންނަ "ރައީސް ޔާމީންގެ 2018" ކެމްޕޭން އޮފީސް ކުރިމަތިން އޮންނަ ހުސް ބިން ސާފުކޮށް، އެތަނުގައި ފަނުން ފެންސް ޖަހައި، އެ ސަރަހައްދު ޒީނަތްތެރި ކުރުމުގެ މަސައްކަތް އަންނަނީ ކުރަމުންނެވެ.
މައުލޫމާތު ލިބިފައިވާ ގޮތުގައި "ފުނަ" ޝޯވ ބާއްވާ ތަން ތައްޔާރު ކުރުމާއި އަދި މުޅި ރަށް މިކަމަށްޓަކައި ޒީނަތްތެރި ކުރުމުގެ މަސައްކަތް ކުރިއަށް ގެންދަނީ އެފްވައިސީގެ ފަރާތުންނެވެ.
އެފްވައިސީގެ އޮފިޝަލަކު 'އައްޑޫލައިވް' އަށް މައުލޫމާތު ދެމުން ބުނި ގޮތުގައި މިހާރު ތައްޔާރު ކުރެވެމުންދާ ތަން ތައްޔާރުކޮށް ނިމޭ އިރު އައްޑޫގައި ޒަމާނުއްސުރެ ކުރަމުން އައިސްފައިވާ ސަގާފީ ހުރިހާ ކަމެއް ފެނިގެންދާނެ ކަމަށެވެ. އެގޮތުން އެތަނުގައި ކުރީ ޒަމާނުގައި ހުރި ގޮތަށް ގެތަކާއި، ކަނބުރުގެއާއި އަދި އޭގެ އިތުރުން އަތްތެރި މަސައްކަތުގެ ހުރިހާ މަސައްކަތެއް ދެއްކޭ ގޮތަށް ތައްޔާރު ކުރެވިގެންދާނެ ކަމަށް އޮފިޝަލް ބުންޏެވެ.
ހޯމް މިނިސްޓްރީގެ ބެލުމުގެ ދަށުން ކުރިއަށް ގެންދާ "ފުނަ" ޝޯވް ގެ ހަރަކާތް އޮންނާނީ އޮކްޓޯބަރ މަހުގެ 2 ވަނަ ދުވަހާއި 3 ވަނަ ދުވަހުއެވެ.