މިމަހުގެ 25 ވަނަ ދުވަހު އައްޑޫގައި ބޭއްވުމަށް މަސައްކަތް ކުރި އެމްޑީޕީގެ ބޮޑު ޖަލްސާ ބާއްވާނެ ތާރީޚެއް ފަހުން އިއުލާން ކުރާނެ ކަމަށް އެމްޑީޕީގެ އައްޑޫ ސިޓީ ދާއިރާގެ ރައީސް އަހްމަދް އަދުހަމް ވިދާޅުވެއްޖެއެވެ.
'އައްޑޫލައިވް' އަށް މައުލޫމާތު ދެމުން އަދުހަމް ވިދާޅުވި ގޮތުގައި، ޖަލްސާ ފަސްކުރަން ޖެހުނީ ޖަލްސާގައި ބައިވެރިވާން މާލެ އިން ވަޑައިގަންނަވާ ބޭފުޅުންނަށް ފްލައިޓުން ޖާގަ ނުލިބިގެން ކަމަށެވެ. އަދި ޖަލްސާ ލައިވް ކުރުމަށް ވެސް ދަތި ތަކެއް ހުރުމަކީ ވެސް ޖަލްސާ ފަސްކުރަން ޖެހުނު އެއް ސަބަބު ކަމަށް އަދުހަމް ވިދާޅުވިއެވެ.
އައްޑޫގައި އެމްޑީޕީ އިން ބާއްވާން ހަމަޖެއްސި ޖަލްސާގައި އެޕާޓީގެ ރައްޔިތުންގެ މަޖިލިސް މެންބަރުންނާއި ގައުމީ މަޖިލިސް މެންބަރުން ބައިވެރިވެ ވަޑައިގަންނަވާ ގޮތަށް ހަމަޖެހިފައިވެއެވެ.
އެމްޑީޕީގެ ބޮޑު ޖަލްސާއެއް އައްޑޫގައި އެންމެ ފަހުން ބޭއްވި މިދިޔަ އެޕްރީލް މަހުގެ ތެރޭގަ އެވެ.