ޕްރެޒިޑެންޓްސް ކަޕްގެ ސެމީ ފައިނަލުގައި މިއަދު ހަވީރު މާޒިޔާ އާއި ޓީސީ ބައްދަލުކުރާ މެޗް ވެގެން ދާނީ މި މުބާރާތުގައި މިހާތަނަށް އައްޑޫ ސިޓީގައި ކުޅޭ އެންމެ ފޯރިގަދަ މެޗަށެވެ.
ބައެއް ފަރާތްތަކުން ބުނާގޮތުގައި މިއަދުގެ މެޗަކީ، މާޒިޔާގެ ޒުވާން ފޯވާޑް އަހްމަދް ނާޝީދް ނައްޓޭ އާއި ޓީސީގެ ކޯޗް މުހައްމަދު ނިޒާމް (ނިޒާމްބެ) ގެ ކުރިމަތިލުމެއް ކަމަށެވެ. އަމިއްލަ ރަށުގައި މާޒިޔާ އާޢި އެއްކޮށް ނިކުންނަ އިރު ނައްޓޭގެ ފަހަތުގައި ތިބި ހިތަދޫގެ ސަޕޯޓަރުންގެ ފަރާތުން މާޒިޔާއަށް ހޫނު ތަރުޙީބެއް ލިބިގެންދާނެ ކަމަށް ބެލެވެއެވެ.
ހަމަ އެގޮތަށް ސ.ފޭދޫ އަށް ނިސްބަތްވާ ނިޒާމްބެ މުބާރާތަށް ޓީސީ ގޮވައިގެން ނިކުތީ އޭނާގެ ބައްޕަގެ ހުވަފެން ހަގީގަތަކަށް ހެދުމަށްޓަކައެވެ. އެހެން ކަމުން ފޭދޫގެ ގިނަ ބަޔަކު ވެސް މިއަދުގެ މެޗްގައި ޓީސީއަށް ސަޕޯޓް ކުރުމަށް ދަނޑަށް ދާނެ ކަމަށް ބެލެވެއެވެ.
ނިޒާމްބެގެ ބައްޕަ އަލް މަރްހޫމް ހުސެއިން ދީދީ (ޖޯޖް) އަކީ އައްޑޫގެ ފުޓްބޯޅައިގެ ތާރީޚުގައި އެންމެ ފާހަގަކޮށްލެވޭ ޓީމް ކަމުގައިވާ، ޑިލައިޓްފުލް ނެއިބާސް ކްލަބު (ޑީއެންސީ) ގައި އިސްކޮށް ހަރަކާތްތެރިވި ބޭފުޅެކެވެ.
ޒުވާން ކުޅުންތެރިޔާ ނައްޓޭގެ ފަރާތުން ހުނަރުވެރި ކުޅުމެއް މިމުބާރާތުގައި ފެނިގެން ގޮސްފައިވާއިރު މިއަދުގެ މެޗްގައި ވެސް އެ ހުނަރުވެރިކަން ފެނިގެންދާނެއެވެ. ރާއްޖޭގެ ފުޓްބޯޅައިގައި މިވަގުތު އެންމެ ވަރުގަދަ ސްކޮޑެއް އޮތް މާޒިޔާ އާއި ޓީސީ ބައްދަލު ކުރާ މެޗް ފަށާނީ މިއަދު ހަވީރު 15:45 ގައެވެ.