ރާއްޖޭގެ އެންމެ ބޮޑު ސިޔާސީ ޕާޓީ އެމްޑީޕީގެ ފަރާތުން އައްޑޫ ސިޓީގައި ބާއްވަން ހަމަޖެއްސި ޖަލްސާ ފަސްކުރުމަކީ، އެޕާޓީ އައްޑޫ އިން ފޮހެވިގެން ދިޔަ ކަމުގެ ނިޝާނެއް ކަމުގައިި، އައްޑޫގައި ޕީޕީއެމްގެ ހަރަކާތްތަކުގައި އިސްކޮށް އުޅުއްވާ އީނާ ނަސީރު ވިދާޅުވެއްޖެއެވެ.
އީނާ ވިދާޅުވި ގޮތުގައި މީގެ ކުރިން ސީޓް ނުލިބިގެން އެމްޑީޕީގެ ޖަލްސާއެއް ނުބޭއްވިފައި ނުވާ ކަމަށާއި ފްލައިޓްތައް ޗާޓަރުކޮށްގެން މާލެ އިން މީހުން ގެނެސްގެން ވެސް ޖަލްސާތައް އެމްޑީޕީ އިން އައްޑޫގައި ބޭއްވި ކަަމަށެވެ. އަދި މީގެ ކުރިން ވިއްސާރަ އާއި އަވީގައި ވެސް ޖަލްސާތައް ބާއްވަމުން އައި ބަޔަކު އުޒުރު ދެއްކުމުގެ ބޭނުމެއް ނެތް ކަމަށާއި ޖަލްސާގައި ބައިވެރިވާނެ ބަޔަކު އެމްޑީޕީ އަށް ނުވީ ކަމަށެވެ.
" މީގެ ކުރިން ވިއްސާރައިގައި އަދި އަވީގައި ޖަލްސާ ބާއްވަމުން އައި މީހުން އުޒުރު ދެއްކުމުގެ ބޭނުމެއް ނެތް. ހަމަ ބަޔަކު ނުވީ. މިއީ ޕީޕީއެމް އައްޑޫ ސިޓީއަށް ގަދަވި ކަމުގެ އުފާވެރި ނިޝާން " އީނާ ވިދާޅުވިއެވެ.
އީނާ އިތުރަށް ވިދާޅުވި ގޮތުގައި، ޕީޕީއެމް އަށް އައްޑޫގައި ތާއީދު ބޮޑުވަމުން ދަނީ، ފޭދޫ ދާއިރާގެ މެންބަރ އިބްރާހިމް ދީދީގެ ބުރަ މަސައްކަތުގެ ސަބަބުން ކަމަށެވެ.
އެމްޑީޕީ އިން ބުނާ ގޮތުގައި މިމަހުގެ 25 ވަނަ ދުވަހު ބާއްވަން ހަމަޖެއްސި ބޮޑު ޖަލްސާ ބާއްވާނެ ތާރީޚެއް ފަހުން އިއުލާން ކުރާނެ ކަމަށެވެ. އައްޑޫގައި އެންމެ ފަހުން ބޭއްވި އިންތިޙާބްތަކަށް ބަލާއިރު ކުރީގައި އުޅެނީ އެމްޑީޕީއެވެ. އެގޮތުން ކައުންސިލް އިންތިޙާބްގައި ވެސް އެމްޑީޕީ އިން ކުރިމަތިލި ބޭފުޅުން ކާމިޔާބު ހޯއްްދަވާފައި ވާއިރު، މަޖިލިސް އިންތިޙާބުގައި އައްޑޫގެ 7 ދާއިރާގެ ތެރެއިން ޕީޕީއެމް އަށް ލިބިފައިވަނީ އެންމެ 2 ގޮނޑިއެވެ.