އައްޑޫ ސިޓީ ހިތަދޫގައި މިއަދު ހަވީރު ހިނގި ނުރައްކާތެރި އެކްސިޑެންޓްގައި ބޮލަށް ސީރިއަސް އަނިޔާތަކެއް ލިބުނު މުޙައްމަދު އަފްޒަލް، 21 އިތުރު ފަރުވާއަށް މާދަމާ ހެނދުނު މާލެ ފޮނުވާލާނެ ކަމަށް ހިތަދޫ ރީޖަނަލް ހޮސްޕިޓަލުން ބުނެފިއެވެ.
ހިތަދޫ ރީޖަނަލް ހޮސްޕިޓަލް ހިންގެވުމާއި ހަވާލުވެ ހުންނެވި ޚަދީޖާ ހަފްސާ ވިދާޅުވި ގޮތުގައި، މާދަމާ ހެނދުނު ފްލައިޓުން އަފްޒަލް މާލެ ފުރުވާލެވޭނެ ކަމަށާއި މިހާރު ޖާގަ ވެސް ކޮންފާމް ވެފައިވާ ކަމަށެވެ.
ހަފްސާ ވިދާޅުވިގޮތުގައި، އަފްޒަލް މާލެ ފޮނުވާލުމަށްޓަކައި އެމްއެންޑީއެފް ސަދަން އޭރިޔާގެ ހެލިކަޕްޓަރުގައި ފޮނުވާލެވޭތޯ ވެސް މަސައްކަތް ކުރި ކަމަށެވެ. އެހެން ނަމަވެސް މިވަގުތު ހެލިކަޕްޓަރު މަރާމާތަކަށް ގްރައުންޑްކޮށްފައި ވުމުގެ ސަބަބުން އެކަން ހަމަޖެހޭ ގޮތެއް ނުވީ ކަމަށް ހަފްސާ ވިދާޅުވިއެވެ.
މަންޒަރު ދުށް މީހަކު 'އައްޑޫލައިވް' އަށް މައުލޫމާތު ދެމުން ބުނިގޮތުގައި އެކްސިޑެންޓް ހިނގާފައިވަނީ ލިންކް ރޯޑުން ސައިކަލް ދުއްވާފައި ދަނިކޮށް ގޯޅިއަކުން ކުއްލިއަކަށް ނިކުތް ކާރެއް ފެނިގެން ބުރަކި ޖައްސާލުމުން ސައިކަލް ކަހާލައިގެން ގޮސް ކަމަށެވެ.
މި އެކްސިޑެންޓު ހިނގި އިރު އަފްޒަލް އިނީ ސައިކަލްގެ ފަހަތުގައެވެ.