މާލޭގައި އިންނަ މީހާގެ ކައިރިން އަހައިގެން ނޫނީ ރަށުގައި ހުންނަ މީހާއަށް ފޮޑިއެއް ވެސް ނުޖެހޭ ހާލަތު އައިސްފައިވާ ކަމަށް އައްޑޫ މީދޫ ދާއިރާގެ މެންބަރ ރޮޒެއިނާ އާދަމް ވިދާޅުވެއްޖެއެވެ.
'އައްޑޫލައިވް' އަށް މައުލޫމާތު ދެއްވަމުން ރޮޒެއިނާ ވިދާޅުވިގޮތުގައި، ސަރުކާރުގެ އިދާރާތަކުގެ އަމަލްތައް ހުރި ގޮތުން ލާމަރުކަޒީ ކުރުމުގެ ބޭނުން އެއްކޮށް ނެތިގެން ގޮސްފައިވާ ކަމަށެވެ.
" މާލޭގައި އިންނަ މީހާގެ ކައިރިން އަހައިގެން ނޫން ގޮތަކަށް ރަށުގައި ހުންނަ މީހާއަށް ފޮޑިއެއް ވެސް ނުޖެހޭ ހާލަތު މިވަނީ އައިސްފަ "، ރޮޒެއިނާ ވިދާޅުވިއެވެ.
ރޮޒެއިނާ މިގޮތަށް ވިދާޅުވެފައިވަނީ، އައްޑޫގައި އެމްޑީޕީގެ ޖަލްސާއެއް ބޭއްވުމަށް ހުުއްދަ އަކަށް އެދި، އައްޑޫގައި ހުންނަ ހައުސިން މިނިސްޓްރީގެ ޑިޕާޓްމަންޓަށް ހުށަހެޅުމުން އެކަމުގެ ހުއްދައަށް އެދި ސީދާ ހައުސިން މިނިސްޓްރީއަށް ސިޓީ ފޮނުވުމަށް އެންގެވުމާއި ގުޅިގެން އެކަމާއި ކަންބޮޑުވުން ފާޅުކުރަމުންނެވެ.
އައްޑޫ ސިޓީގެ ރައްޔިތުންނާއި ގާތުން ހައުސިން މިނިސްޓްރީގެ ހިދުމަތްތައް ދިނުމުގެ ގޮތުން މިނިސްޓްރީގެ ޑިޕާޓްމަންޓެއް ޤާއިމްކޮށްފައިވީ ނަމަވެސް އެތަނުން އެކަށީގެންވާ ޚިދުމަތްތަކެއް ނުލިބޭ ކަމަށް އައްޑޫގެ ގިނަ ރައްޔިތުން ފާހަގަކުރެއެވެ.