އައްޑޫ ސިޓީ ހިތަދޫގައި އެމްޑީޕީގެ ޖަލްސާ އެއް ބޭއްވުމަށް ހުއްދައަށް އެދި ހައުސިން މިނިސްޓްރީގެ އައްޑޫ އޮފީހަށް ހުށަހެޅުމުން، އެކަމުގެ ހުއްދައަށް އެދި ހުށަހަޅަން ޖެހޭނީ މާލޭގައި ހުންނަ މިނިސްޓްރީގެ އޮފީހަށް ކަމަށް އެމްޑީޕީ އަށް އަންގައިފިއެވެ.
އައްޑޫ ސިޓީ އެމްޑީޕީގެ ރައީސް އަހްމަދު އަދުހަމް ވިދާޅުވި ގޮތުގައި، އެމްޑީޕީގެ ޖަލްސާ ހިތަދޫގައި ބޭއްވުމުގެ ހުއްދައަކަށް އެދި އައްޑޫގައި ޤާއިމްކޮށްފައިވާ ހައުސިން މިނިސްޓްރީގެ ޑިޕާޓްމެންޓަށް ހުށަހެޅީ މިއަދު ކަމަށެވެ. އެހެން ނަމަވެސް އެ ހުއްދަ ދޫކުރާނީ ސީދާ މާލޭގައި ހުންނަ ހައުސިން މިނިސްޓްރީގެ އޮފީހުން ކަމަށް އަންގާފައިވާ ކަމަށެވެ.
އަދުހަމް ވިދާޅުވި ގޮތުގައި، މިނިސްޓަރ އަށް އެޑްރެސކޮށް އެ ސިޓީ މާލޭގައި ހުންނަ މިނިސްޓްރީގެ އޮފީހަށް ހުށަހެޅުމަށް އެންގުމާއި ގުޅިގެން މާދަމާ މާލޭ އޮފީހަށް ސިޓީ ހުށަހެޅުމަށް ނިންމާފައިވާ ކަމަށެވެ.
އައްޑޫ ރައްޔިތުންނަށް މިނިސްޓްރީގެ ޚިދުމަތްތައް ގާތުން ދިނުމަށް ޤާއިމްކުރި، އެ މިނިސްޓްރީގެ ލޭންޑް، ބިލްޑިން އެންޑް މުނިސިޕަލް ޑިޕާޓްމަންޓްގެ އިސްވެރިޔެއްގެ ބަހެއް ހޯދާލުމަށް 'އައްޑޫލައިވް' އިން ކުރި މަސައްކަތް ވަނީ ކާމިޔާބު ވާގޮތް ނުވެފައެވެ.